مسابقة الشعر العامى

ليل داخلى . مسابقة الشعر العامى بقلم / محمد محمد الساعى من مصر


الأسم : محمد محمد الساعي – مصر
فئة الشعر العامي
ت : 01284199202
اسم القصيدة : ليل داخلي

المشهد باين م الأول
كان ليل داخلي
وإضاءته الخافته بتوحي بإن القادم ساخر
الكادر بيفتح ع الآخر
ف تبان الصوره يادوب نغابيش
وحوار بكلام مش مترتب
وكأن الليله بتشغي حشيش
نص الكلام كان منتهي .. والباقي رقص
ودليل بيثبت وقتها ..
ان البطل كان عنده نقص
عمَّال يرُص ف كلمتين مش مفهومين
“زووم ع العنين .. ال مفضوحين الكدابين ”
وبتبتدي رحلة حكايته ع اللي كان
عن قوته ال 2000 حصان
عن انه دايما دونجوان
عن إنه فارس .. والزمان
يوم جار عليه
بس بإيديه .. رجَّعْلُه تاني الهيلمان
والبطله سارحه ف نظرته وكدب العنين
“الزووم بيبعد حبتين ”
ف تبان تفاصيل الحكايه كلها
نفس الرتابه .. والكآبه والملل
المشهد الحالي اكيد صابه الخلل
والكاميرامان سارح بعيد
والمخرج اللي يادوب عنيه ..
مش شايفه غير دخان سيجارته
غرقان في حالته المستميته في الشغف ..
بالكدابين
بس البطل ..
اصبح مسيطر ع المكان
سلطان بإيده الصولجان ..
وبيرتجل في حوار ركيك
يخدع عنيك .. ف تشوف خيال
الإرتجال اوقات يفيد
وكتييييييير بيخلق للبطل جو المؤامره
والوصول للإكتمال
ف يغير المشهد بنظره من عنيه
حركة ايديه ..
خلَّت عيون الناس تتوه
بلاتوه بيشغي بالبغايا الطبالين
والبطله ساكته كأنها..
كومبارس صامت من سنين
كل العنين متشعلقه بسيدنا البطل
اللي ببراعه بيقلب الأحلام .. أنين
“الماستر سين ”
المخرج حاول انه يفوق ويقول اكشن
علشان يبدأ مشهد تاني ف كادر مغاير
البطل الأوحد
صمم انه .. يسرق م المجاميع الشوت
من غير كلاكيت
ابتدا يهزي بكلام عن واقع مش ملموس
البطل اتقمَّص دور شمشون
اما البطله ..
كات ايرما لادوس

#محمد_الساعي

الوسوم

همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.

إغلاق