الشعر والأدب

مصر…قصيدة للشاعر / ناصر دويدار

مصر بتتقلب فىّ

على نار هاديه

فتطلع فوانيس

شعر كنافه مفرود على وش صينيه

قطايف بتدوّر على حضن زبيب
تتلم عليه

أصوات بتشد فى بعض

من على بُعد
زحمه سوق

ريحه ينسون

بتحط إيديها على كتف كراويه

بياع بينادى على ملوخيه وباميه

ست عجوزه بتنهج

من تقل السبت الشابط فى دراعها

دكاكين مفتوحه بتبص على الشارع

مادنه جامع

وحوارى نامت فى الضل

زينه بتخروش على خيط ممدود

من سطح لسطح

من بلكونه لبلكونه

من بيت لبيوت

من مصر ………..للأوطان

ياااااااااااااااااااااالله

وبرغم الألم اللى ف صدرى من شئ

مش عارفه

لسه قلبى بيطمن

وبلادى بتتقلب فىّ

على جمره روحى

الوسوم

همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

إغلاق