الرئيسية » مسابقة الشعر العامى » مليش في السياسة.مسابقة الشعر العامى بقلم / إسماعيل العجمى .مصر

مليش في السياسة.مسابقة الشعر العامى بقلم / إسماعيل العجمى .مصر

Spread the love


قصيدة عامية مسابقة همسه 2018 للشاعر / اسماعيل العجمي _ مصر
بعنوان مليش في السياسة
________________________________________
مليش في السياسة لكني بشوف
وبقدر احط النقط ع الحروف
وقبل أما أطالب بكلمة رحيل
بشغل دماغي واشوف البديل
وابص ف عينيكي أشوف كل حاجه
وبقدر أميز بدون ما يقولولي
ما بين اللي قاتل وبين القتيل
مليش في السياسة لكني بحاول
مكنش في ارضك هبيل أو قابيل
مليش في السياسة لكني بميز
ما بين اللي حافظ وبين اللي فاهم
وبين اللي خرب وبين اللي ساهم
وبين اللي ضلل عليكي برموشو
وبين اللي باعك بحبة دراهم
مليش في السياسة لكن متغابتشي
مرحتش ورا اللي بيخدع مجتشي
آمنت بظروفك وامنت خوفك
وشفتك حكاية كفاح منتهتش
دا روح انتصارنا في لحظة عبورنا
تقولك بأن اللي خلف مامتش
مليش في السياسة
لكن ليا فيكي جذور المحبة
هناك فرق واضح
ما بين اللي صارح وبين اللي خبي
وبين اللي شاري وبين اللي ربي
وبين اللي يسمع وبين اللي شاف
مليش في السياسة وبقول للدواعش
بأن اللي حبك لا يمكن يخاف
كتبنا التاريخ اللي عدى بدمانا
عشان مصر دايما تكون الغلاف
منردمش نبع المحبه بخيانه
منهدمش امه بحبة خلاف
نوايبك شديدة وحبك فريضه
وروحك بترقص تملي وسعيده
ما بين اللي لبي وبين اللي طاف
ماليش في السياسة وقالوا اني سلبي
عشان تاهو جوه الوريد اللي فاصل
ما بين حكم عقلي وبين عطف قلبي
بحبك وربي اللي شاهد عليا
تعالي ارمي همك في قلبي اللي شالك
وطبطب عليكي وكفن عيالك
انا ابنك يا مصر اللي سابهم وجالك
انا ابنك حلالك
وربك في كل الحلال راح يبارك
مليش في السياسة
لكن ليا جندى وسلاح في الكتايب
وليا اعترافي أن حبك في دمي
وجوايا لهفة علي ابني اللي غايب
يا صوت البنادق يا لحن العساكر
يا شايل في جيبك جميع التذاكر
لآخر محطة في سكة وصولي
يا صوت البنادق تمهل شويه
وقول للي ساخط علينا احنا مين
وحدد في قولك بنود القضية
ونور بضيك طريق مكفوفين
وكون ليا شافع وهاجم ودافع
ومد الرصاص جوه ناس مجرمين
يا صوت شلت همي اضحي بدمي
ولا اختي ولا امي
يكونوا وليمة لكلاب مسعورين
يا صوت كون معانا وشيل جوه منك رسالة اهانه
لكل اللي يهتف بأسم الكنانه
ويفرح بصوت انفجار في الكمين
هدفنا انسحابهم
ويوم القيامة هيتقل حسابهم
فيبقوا ف جهنم بكتر عذابهم
وناخد كتابنا بايدنا اليمين

تعليقات

تعليقات

عن همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

شاهد أيضاً

رسالة من الغربة,مسابقة الشعر العامى,بقلم/صابر فرج ياسين على .مصر

Spread the love مسابقة الشعر العامي الأسم صابر فرج ياسين على ( جمهورية مصر العربية …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *