مسابقة الشعر العامى

مني الي حوا..مسابقة الشعر العامى بقلم/ محمد خليفة من مصر

الاسم : محمد خليفه
العنوان : المنصوره / مبت غمر
رقم التيلفون : 01211799719
مجال الاشترام : شعر عامي

_ مني الي حوا _

المغزي مـ الحكايات / أنثي كما النحات
تنحت بفعل الدمع / والقلب زي القُمع
يصّفي نص الدم / يعصر سفنج جراح
أبونا آدم راح
من فِعلها الهدمي
ووجودي من عَدمي
في الكون ده مجاني وخَطِيتي في الدنيا
اني في زمن تاني / ناسك وروحاني
ماسك في احلامي / صورتها قدامي
حوا يابنت الروح / ما كفايه تشتي جروح
علي فرشة الزاني / عاشر بقايا الحلم
أصبح واحد تاني
زي اما كنت بَـهين / وألعن فـي وجداني
__ المغزي يا آدم __
مـ الضعف في التلقين
ازاي تبيح الوجع / والشك فيك ده يقين !!
انك ورغم انك
مطرود من الجنه
كان حتمي تتهني / مع هي مش غيرها
كونك في تفكيرها
وفاكرها قال حارماك
من رحمة المولي
كان أولي بيك أولي
تلعن شيطان روحك / وتسبه بالمسموح
انه عَداك بالبوح لِعب وميِّلها
هتاكلوا مـ التفاح هتميل ويعدلها
و حوا آااه منها لو بس تتكلم
المعني والمضمون/ فـ ان انت تتعلم
حين ما تقرا الظرف من رسمة العنوان
تقف ثبات وتبان بتحارب القافيه
في سطر جوا الروح / حتماً وبالعافيه
يخرج من التصنيف يمسح في كل الزيف
ويفسر الــ ( عنوان )
لو يعني بالامكان
هتداري فيك خوفها ..
_ طب أراعي ليه ظروفها
طول م الهوا يسمح
بيا القلم يسرح مني مش مِنا
لو بس كان ربنا / يسيبنا في الجنه
وماكانش النبي أدم
كل من التفاح
مكانش في شاعر/ أصبح كتابه براح
__ المغزي ياحوا __
من مجلسـه عـ العرش
انه خلقنا ضِعاف/ تايهين في كومة
قش/ حظ الغريق منها
تعليقه بالقشه
كل القلوب هَشه
رخْوه من جوه
حواليها بس ضلوع
حامياها وبقوه
لكن محال القدر/ يطاوعنا لو مره
رَمْيتنا للأرضي/ مش مُرَّه بالمرَّه
حكمته في الخلق/ انه يسيبنا نميل
يبتلينا فنزعل نرجع بقلب عليل
للنيل في وقت الليل
وجمال وريحة الفـُّلّْ
سبحانه عَّـزَّ وجَّلّْ
قل للذي قد قلّ /عشقه اللي فـ الموازين
أدم وحوا اتنين عاشوا بجسد واحد
والصوره مـ الجنبين/ دايما كادِر واخد
طبع الرصيف خواف
حلمك عجوز متشاف
عجِّز من الرحله / أعوذُ/ مـ المحنه
ومن كل فجرٍ آت أدم وحوا اتنين
لكن مهومش اخوات

الوسوم

همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

إغلاق