الشعر والأدب

ورا ضهر المسرح ..قصيدة للشاعر / طارق أبو النجا


ورا ضهر المسرح

**********

ورا ضهر المسرح بنمثل .. ومفيش جمهور
وممثل يائس ومكسل .. مش عاجبه الدور
يسكت تاره
وينطق تاره
والمسرح ماعليهشي ستاره .. ولا لمبة نور
*********
فيه واحد بيقول أشعاره .. جي من الريف
(علي بابا ) وطيب وف حاله .. هادي و حريف
وف يوم جانا
معاه “مُرجانه”
دوَّخنا بغزلُه و شجانا .. والقصد شريف
**
ولا واحد فينا ،الا ماصقف .. ولا كان مبهور
والناحيه التانيه من المسرح .. عايق مشهور
ورا ضهر المسرح بنمثل .. ومفيش جمهور
**********
قام واحد بيحب بلاده .. و بيها مفتون
يحلف بترابها و بولاده .. وبغصن زتون
لتعيش حُرَّه
جوَّه وبرَّه
يفديها بروحه ميت مرَّه .. و العمر يهون
**
والدمع ف عينه نزل يسبح .. في قلوبنا بحور
والناحيه التانيه من المسرح .. أفراح وطهور
ورا ضهر المسرح بنمثل .. ومفيش جمهور
*********
قامت واحده ، يمكن وحشه .. كات لابسه “جيبون”
ومهيش عايقه ، ولا زي .. بنات ” التليفزيون ”
أقسم بالله
قلنا لها : الله
من حسن الشعر اللي بنقراه .. من أحلى عيون
**
والعطر مايغلاش بإزازتُه .. إنما بزهور
ياحلاوة العنب اللي مزازتُه .. تشعط في الزور
ورا ضهر المسرح بنمثل .. ومفيش جمهور
*********
وبنحلم لو قلبوا (الصوره) .. وبقينا أدَّام
أسياد من “مقهى المنصوره” .. مش م ِالخُدَّام
وهالات النور
حوالينا تدور
ونعدي العتمه ، نهد السور .. نرفع أعلام
**
وولادنا تفرح بكلامنا .. أيام وشهور
لا “فاجومي” ولا “خالتك آمنه” .. و”الجخ” يغور
وف قلب المسرح مطرحنا .. وسط الجمهور
*****
طارق شعبان أبو النجا
20/12/2016

الوسوم

همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

إغلاق