الرئيسية » الشعر والأدب » وصية أُمّ.زقصيدة للشاعر / طه إبراهيم

وصية أُمّ.زقصيدة للشاعر / طه إبراهيم

Spread the love

طه ابراهيم
*****
لما حملت الشنطه ف كتفي
وامي بتبكي فوسط الدار
قالت ليه يا ضناي هتمشي
قلبي يا ولدي مولع نار
خايفه يا ولدي عليك م الغربه
أهل الشر يا ولدي كتار
وانته يا حبة عيني صغير
لسه ملكش يا واد ف الكار
خلي الصوره بتاعتك جنبي
قدام عيني ليل ونهار
يمكن تملي الدنيا عليا
لما أتوه وسط الافكار
فجأه الغربه هتخدك مني
إمتي هشوفك جوه الدار
انت ف عيني وجوه النني
قلبي عليك يا حبيبي إحتار
خليك واعي يا ولدي لنفسك
إوعي تسلم للأشرار
إوعي بنات الليل تغويك
إوعي تجيب لأبوك العار
إوعي الفتنة تأثر فيك
غلطه تشدك جوه النار
أرض الغربه وفيها عجايب
فيها الشر وفيها عمار
فيها العلم وفيها الجامع
فيها حجات والليل ستار
واللي يفرط ياما يشوف
دنيا عجيبه وليل غدار
إوعي تفرط يوم في ضميرك
خليك يا ابني مع الأحرار
إوعي تخلي الشهوه تهينك
تفضل عايش جوه البآر
خليك فاكر يا ابني كلامي
حلقه في ودنك ليل ونهار
أول ماتخش المحروسه
إمشي ودور ع الابرار
بين الأزهر والمقامات
إقرا الورد مع الأذكار
واقرا الفتحه لإبوك متولي
ياما عليهم لف وزار
يوم الجمعه يسافر بدري
قلبه مشعشع بالأنوار
خليك فاكر أبوك الطيب
ياما إتمني تكون ف القار
خدها يا ولدي أبوك عن جدك
كان معروف أحسن نجار
لكن ولدي إنت اللي إخترت
وانا حظرتك ليل ونهار
ياله يا ولدي الليل هيضلم
اركب وامشي ف أي قطار
ربي يصونك يا ابني يا سندي
ويحفظ عمرك م الأخطار
تيجي لبلدك تاني أفندي
وتملي عليا البيت والدار

*******
بقلم / طه إبراهيم

تعليقات

تعليقات

عن همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

شاهد أيضاً

كفكف الدمع .قصيدة للشاعرة / نرجس عمران .سوريا

Spread the loveالأدب كفكف الدمع كفكفْ دموعك أبتي مِن مثلك أباء غيبهم القهر مازال للصبر …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *