الرئيسية » مسابقة الشعر العامى » وصية ..مسابقة الشعر العامى بقلم / أحمد حامد رسلان من مصر

وصية ..مسابقة الشعر العامى بقلم / أحمد حامد رسلان من مصر

خاص بالمسابقة
أحمد حامد رسلان _مصر أسيوط_ت/01281297719
شعر عامي
………..
وصية
…………..
بكرة يابني
يوم هتلاقاني هنا
وسط أهلي
المدفونين من ميت سنه
ابقى ديما افتكرني
وإن وحشتك أبقى زرني
حتي لو ترمي السلام
اعتبرني لسه عايش م الأنام
وافتكرني بدعوة حلوة في الكلام
راح بتوصل أحلى نسمة للمنام
………………………………….
وافتكرني بأي لحظة ليك زمان
حبي كانلك بير حنان
كنت أضمك وأنته خايف
حضني يبقى لك أمان
كنت بفرح لما تضحك
كان بيخضر المكان
قلبي لما كنت تلعب
كان بيعزف بالكمان
واما تفرح واما تغضب
واما تتشاقى وتتعب
كل لحظة ليك جنان
……………………………….
بكرة يابني يوم هفوتك
خلي صبر الكون سكوتك
طول ما حب الناس ده قوتك
دنيتك هتكون تمام
طيع في ربك يبقى جنبك
وان عصيته توب بذنبك
تلقى مولى الكون غافرلك
رحمته ماليه المكان
………………………………..
عيش حياتك وانته راضي
تلقى رب الكون يراضي
وان لقيت الظلم عاتي
اوعى يابني تكون جبان
خلي صوت الحق عالي
تلقى ظلم الكون مطاطي
طول ماربك فينا قاضي
راح تحس انك معان
………………………………..
وامشي ديما ع المبادئ والأصول
وابقى ديما يابني راجل
ابقى واد شيال حمول
صحي عقلك جوه راسك
خلي هم اليوم مداسك
مهما كان المر كاسك
اوعى تشعر بالخمول
…………………………………….
حب أهلك حب ناسك
واوعى تنسى ف يوم أساسك
دا الغرور مش من مقاسك
دانته يابني أنسان خجول
وابقى علق يابني صورتي
وابقى هات لأحفادي سيرتي
خلي بينا الوصل ديما
راح أقابلك في الوصل

تعليقات

تعليقات

عن همسه

فتحى الحصرى صحفى فنى ومصور فوتوغرافى محترف ..الصورة عندى هى موضوع متفرد قائم بذاته والكلمة هى شرف الكاتب هكذا تعلمت من اساتذتى فشكرا لكل من تعلمت منهم

شاهد أيضاً

مصر ست الكون بحالو. مسابقة العامية بقلم / محمود ربيع من مصر

قصيدة عاميه (مصر سِت الكون بِحَالو) محمود ربيع عبد الحميد مصر اسيوط ديروط …………………………………………. مصر …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *