مسابقة الشعر العامى

يااسكندرية . مسابقة الشعر العامى بقلم / إخلاص عبد المحسن مصر


إخلاص عبد المحسن
مصر
luuccy2010@gmail.com
شعر عامي

(يا اسكندريه)

يا حلمي اللي رايح و حلمي اللي جاي
يا عقلي اللي سارح في بحرك تمللي
يا قلبي اللي دايما منور بضي
شعاع شمس نورك يا شمسي و ضلي
يا فرحي و يا سعدي بإني في حضنك
و إني يا حلوه بعيش جوه قلبك
يا بنتي يا أختي يا أمي الحنونه
يا أحلى صبيه
جميله و ماريه
رقيقه و شقيه و دره مصونه

و ع البحر ريحتك بتشفي العليل
بتروي الحبايب نهار ويا ليل
و تهدي الحيارى
بمليون عباره
بيكتبها موجك فيشكوا السهارى
فبتجمعيهم و بتطمنيهم
بلمه جميله في وسط الرمال
و كام قلب دايب و كام قلب مال
فتفرح و تلعب و تجري العيال
يا قلعه و سفينه
يا أحلى مدينه
يا واخده في حضنك محمد و مينا
جرس مع أدان
حبايب جيران
يعيشوا في ضلك في أمن و أمان
يا جامعه الحضاره في بحر وكتاب
يا واخده قلوبنا ما بين السحاب
يا ماحيه بثقافتك غيوم الضباب
بحبك بحبك
و من قلبي اقولك
لقيت فيكي نفسي و فيكي حكاياتي
مع البحر بسرح فتفرح حياتي
ألاقي السنين
بتهدر حنين
و مهما تاخدني المداين بجيلك
تعيشي ف نهاري و اعيشك في ليلك
و أركب ترامك فاحس بغرامك
و اتوه جوه عشقك مع العاشقين

بلف ف حاراتك
تاخدني حكاياتك
فأمشي ف شوارعك و أنسى سنيني
و أسرح و أسرح
و أمشي ف جناينك
و طرحك و زرعك شمالي و يميني
تعيشي يا غاليه و روحنا فداكي
و دايما هنفضل نكافح معاكي
و لا يوم هننسى
و لا يوم هننكر
و فضلك علينا بيكبر و يكبر
يا أحلى صبيه
جميله و ماريه
رقيقه و شقيه
و دره مصونه
يا اسكندريه

الوسوم

همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

مقالات ذات صلة

تعليق واحد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

إغلاق