ط
مسابقة الشعر العامى

تغريبة .مسابقة الشعر العامى بقلم / لقمان محمد .مصر

خاص بالمسابقة (الشعر العامي)
لقمان محمد (مصري بالسعودية)
الاتصال وواتساب 00966583344014

العنوان (تغريبة)

سلّة ورود
مليانة شُوك
ووردة طَلّة
بين الشقوق

عيون بتضحك
حضناها دمعة
لا هي بتشكي
ولا بتبوح

والدِّيك بيدَّن
ع المدنة عالي
حالف ما ينزل
قبل الشروق

قامت بِنَيّة
م الصبح بدري
بفيونكة حمْرَا
وخَدّ تُوت

راحت لابوها
مِسْكِتْ إيديَّا
وطِّتْ عليها
وقَعَدِتْ تبُوس

قالت مسافر!
قُلْت مسافر
فَكَّرْتُه حلم
أو يمكن كابوس

ولما شقشق
الصبح شافني
خارج بشنطة
مفهاش هدوم

كل اللي شالها
ما قِدِر يشيلها
الوزن قالوا
دا غير مسموح

شيلْت منها
سنين بحالها
وخدْت بعضي
على حبّة رُوح

تغريبة بدأت
عليَّا ندهت
ردّيت عليها
بصوت مكتوم

لقيتها قالت
زي ما تاخد
منّك هتاخد
واِرضَ بالمقسوم

لقيتها ماسخة
وعنيَها قاسية
الكل غالب
وأنا المغلوب

ورُوحْت ماشي
مع اللي ماشي
سلّمْت أمري
وكان مكتوب

شوفت الخلايق
منها اللي شاردة
ومنها اللي واقف
كمان مقلوب

وشوفت اللي ماسك
في إيده شمعة
يقلّ ضُوءها
يزيدها نور

ناداني مركب
عالشطّ واقف
من غير مراكبي
ولا مركوب

وبعزم كُلّي
حطتني كُلّي
أنا المجداف
وانا المجدوف

فتح دراعُه
على ضهرُه شالني
كَتِّفْت إيدُه
وأنا المكتوف

المُوج حَضَنّي
طبطب عليّا
والريح حملني
كده ع الكُفوف

والطير مسافر
يروح ويرجع
عالشجرة لكن
من غير فروع

عصفور معانا
لمّ جناحاتُه
حنّينا ديلُهُ
مات عالكتوف

جت البلابل
تقرا الوصيّة
شافوا البِنَيّة
بقت عروس

ضحكِت وطلعِت
ساعة العصاري
بقهوة فايحة
وأنا عالسطوح

قرَّبْت منها
مالِت عليّا
مِسْكِت إيديّا
وفِضْلِت تبُوس

فتَّحْت عيني
والدّيك بيدَّن
قالت الصبية
يا بابا قُوم

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى