مسابقة الشعر العامى

ياللا نهد الوطن .مسابقة الشعر العامى بقلم /أحمد رجب النمر

لوجو المهرجان
دكتور / أحمد رجب النمر
قويسنا ــ منوفية
01069678128

فرع القصيدة العامية

” ياللا نهد الوطن ”

ما تقوموا ياللا تعالوا بينا
نهد بإيدينا الوطن
نجرح فى بعض ندبح فى بعض
نقتل فى بعض
و نشوفلنا كدة كام شهيد راح يتدفن
و نبدل الفرح بعزا … و هكذا وهكذا
نقلب تياب العرس و نخليه كفن
ما أحنا يا ناس الكُره ساكن قلبنا
تُهنا خلاص من بعضنا
ما بقينا تانى يد واحدة
و فتحنا أبواب الفتن
ما تقوموا ياللا تعالوا بينا
نهد بإيدينا الوطن

و تعالوا بإيدينا كمان
نِخْرِب لنا كدة كام محل
فيه لقمة لعيش الغلابة
نهدم بيوتهم يشحتوا
يتمرمطوا
يتشردوا
و نسيب عيالهم لقمة سايغة
ينهشوا فيها الديابة
و نزيد بطالة شعبنا
و نعادى ف اللى مننا
ونعلِّى فى بلادنا المحن
ما تقوموا ياللا تعالوا بينا
نهد بإيدينا الوطن

و تعالوا بينا ع الحدود
لموا العتاد هاتوا الحشود
جيبوا المدافع و القنابل و البارود
و بكل غل نشنوا
و اصطادوا أولادنا الجنود
خلونا نقتل حلمنا
نقطف بإيدنا وردنا
و نسيب بلدنا و أرضنا
تتوه فى أنفاق الزمن
ما تقوموا ياللا تعالوا بينا
نهد بإيدينا الوطن

و تعالوا بينا لعم مينا
نجرُّه لينا
و نقتله
و نقول عليه
دا مسيحى كافر
و الحاج راضى
جار عم مينا
هنمسكه
ننتف له دقنه
و نسحله
و نقول عليه
دا بدينه تاجر
و نرمى على بعض التهم
و نعيش فى دور المنتقم
و الحب بينا يتردم
آه يا قلوب صابها العفن
ما تقوموا ياللا تعالوا بينا
نهد بإيدينا الوطن

يا ناس يا هووه
فوقوا بقى
قلوبنا ليه متفرقة
وحدتنا ليه متمزقة
إيدينا ليه متلطخة
بالدم ليه متغرقة
بعد أما كنا يد واحدة واحد
صبحت صفوفنا مشققة
ما تهموا ياللا تعالوا بينا
نعيد بناء مجد الوطن
بالهمة راح نبنى الوطن
بالوحدة راح نبنى الوطن
بالحب راح نبنى الوطن
بالكلمة راح
نبنى الوطن

الوسوم

همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

مقالات ذات صلة

‫15 تعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

إغلاق