الرئيسية » مسابقة الشعر العامى » يامصر..مسابقة شعر العامية بقلم / هناء أمين من مصر

يامصر..مسابقة شعر العامية بقلم / هناء أمين من مصر

السلام عليكم ورحمة الله
الاسم/ هناء أمين
للمشاركة في المسابقة في مجال شعرالعامية
……………..
يامصر إمتى تقلعى توب الحِداد
ويشقشق الفجر الوليد..
وترجّعى حلم الولاد
فجرِك بعيد
حلمك عنيد
موّتى حلمك ليه في مهدُه
ولفّنا الليل والسواد
يا أم ضمّة حلمنا
ورضعنا شهدك كلنا
من حقنا….تحمى اللى فاضل مننا
وتحولى النار للرماد
يا شمس رافضة تنطفى
حضنك دِفى من ضمته لجتت الولاد
كل الرفات اللي ف ترابك دول شبابك
هان عليهم دمهم..
لاجلِك ياواخدة ع العناد
كفايانا دم..ونار وهم
مياقلب أم انهار أملها وحزنها يكسر بلاد
لحظة مخاض الحلم صعبة
ده شئ أكيد
وابنك عندنا
زيّك تمام
مابيكسروش الانكسار
مابيهزموش لو ميت تتار
مابيرضيهوش الا الشهادة أوانتصار
ما انتِ اللى عوّدتيه كده
وربتيه ع العِند ده
ماتغيّريش توبِك بقى
وخليكِ زى ماكنتِ دايما سيدة
وست البلاد
يا شهرزاد…
لسه التاريخ بيسجل
الباقي ف حكايتك
لسّاه مصمم ترجعى لعرشك ومملكتك
لساه مصمم تنتهى حكايتك بفرحة
وطرحة بيضا فوق جبينك
تلبسيها وتقلعى توب الحداد

تعليقات

تعليقات

عن همسه

همسة هى مجلة كل الناس وكل الأعمار . المهنية والصدق شعارنا .ننقل الخبر من مصدره الحقيقى ونسعى دوما للتجديد من أجل القارئ

شاهد أيضاً

مصر ست الكون بحالو. مسابقة العامية بقلم / محمود ربيع من مصر

قصيدة عاميه (مصر سِت الكون بِحَالو) محمود ربيع عبد الحميد مصر اسيوط ديروط …………………………………………. مصر …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *