الرئيسية » مسابقة الشعر العامى » يا ناسي الأم في الزحمة .مسابقة العامية بقلم / إسماعيل العجمى من مصر

يا ناسي الأم في الزحمة .مسابقة العامية بقلم / إسماعيل العجمى من مصر

يا ناسي الأم في الزحمة / شعر عامية بقلم: اسماعيل العجمي
الشرقية _ مصر – هاتف – 01063486343
_____________________________________
يا شايل فى الحياة همك وناسى الام فى الزحمة
وهى فى كل يوم شايلاك ما بين العطف وارحمة
بترفع للسما ايده وتدعى للى مش دريان
بان الام لو رضيت متتحطش فى اى ميزان
وان الام لو غضبت بتدعى ملايكة الرحمن
على القلب اللى يرميها
فكيف يبقى ف ايديك نعمة وبيصيبك جحود بيها
يا ناسى الفرض والسنة
فى ايه اكتر من الجنة
جعلها ربى للطاعة فكانت تحت رجليها
شهور الحمل بتدمع مهيش لاقيه كلام يتقال
وطلق ميلاد بيتجمع ويبعت للمخاض مرسال
فيحيى النبض م الاول
ويضحك نبعها الصافى
عروق الثدى مشدودة عشان ينزل لبن دافى
فتشبع وانت فى اللفة
ولما تحس باوجاعك تلاقى النبض يتكفى
تلف الاودة 100 لفه لكن برضه مهيش عارفه
تنام انت فى احضانها عشان هى تنام واقفه
ولما اتقلت كام كيلو
تقول شد الامل حيلو
وتعمل حجرها ملعب
ولما بتمشى متغمى بتسمع روحها بتسمى
ويسبق قلبها الخطوة
فتفرشلك بساط وردى
تقول خايفه عليك يابنى
تدوق المر من بعدى
وتاخدك جوا احضانها
ويملى العطف اركانها
ويملى الشوق حناياها
ولما اكولت كام سنتي وبقيت تتمشى وياها
ركبت الموج على ريحها
تسافر فيك روايحها
فيضحك شطك المنسى ويرقص تانى قدامها
ومركب عمرك المربوط فى ايامها
مبيصديش
ومهما استقوى على قلبك زمان الطيش
بتتحمل
رسالة وهى بتكمل
لكن جوه الرسالة اهات
واديك عايش وقلبك مات ومش حاسس
بقالك عام بتهجرها وجى تودها فى مارس ؟
عليك من كل شىء خافت
وياما الروح عليك طافت
وبات فى القلب اناتو
بتبعتلك مراسلها
عشان ترجع تراسلها
فيبقى الهم راسلها
صحيح اللى اختشوا ماتوا
فحتما راح يجيلك يوم يكون عهد الصبا وله
وبين اربع حيطان قاعد بتستنى ولو طله
من اللى انت عليه ملهوف
ولا بييجى يقول مالك ولا يطمن فى قلبك خوف
ولا يانس مرار وحده
وطعم الوحدة بيشيب
واهى واحده قصاد وحده
وربك عمرو ما يسيب
فكمل سكة الوحلة
ولون كل شىء بالطين
دا مهما العمر بيطول
لا بد ان الحياة رحلة
بنلبس فيها ما يحلى
ونطلع منها خالعين

تعليقات

تعليقات

عن همسه

فتحى الحصرى صحفى فنى ومصور فوتوغرافى محترف ..الصورة عندى هى موضوع متفرد قائم بذاته والكلمة هى شرف الكاتب هكذا تعلمت من اساتذتى فشكرا لكل من تعلمت منهم

شاهد أيضاً

مصر ست الكون بحالو. مسابقة العامية بقلم / محمود ربيع من مصر

قصيدة عاميه (مصر سِت الكون بِحَالو) محمود ربيع عبد الحميد مصر اسيوط ديروط …………………………………………. مصر …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *