أنا الشاعر .. وأنا الفنان كلامى اكتبه غنوة تتغنى فى كل مكان باسجل فيها أفراحى وديما بالليل اكون صاحى
وبسهر قمرى ويايا
فى نشوة حب صباحى
ولما أحزن وتنسانى
ليالى الفرحة والبسمة
وأحس بخنقه جوايا
مافيش لابرد ولانسمة
الاقى منبر الاحزان
بيستدعنى من نفسى
يزيد وجعى ويجرحنى
من الاحزان يزيد يأسى
وأحس الغربه بين أهلى
وأحس بجفوة الاوطان
أقوم ابكى منا شاعر
وانا حساس عشان فنان
أطيب خاطر الكلمه
واكتبها بدون افراح
كلام موجوع مش قادر
لا بهدا يوم ولا برتاح
واشوف الدمعه فوق خدى
حزين مكسور انا وحدى
عشان بلدى عشان اهلى
وميت ازمه وها تعدى
دة كله ايه الفايدة مش عارف
الاقى الكون بأه ضلمه
وانا جواه وحيد خايف
يزيد الوقت من الاحزان
واقوم ابكى ماانا شاعر
وانا حساس عشان فنان
وتطلع شمسنا تانى
واكتب غنوتى بشوقى
وأمسح دمع احزانى
خلاص قربتى ياشروقى
هنرجع تانى نتجمع
ونبقى اهل من تانى
هانسى انى وحيد خايف
عشان ويايا خلانى
وترجع بسمتى وفرحى
يطيب القلب من جرحى
بلمسه حب وبإيمان
أقوم اضحك ما انا شاعر
وأنا حساس عشان فنان
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
