ط
مسابقة الشعر العامى

أنا المدبوح ..مسابقة الشعر العامى بقلم / إلهام حسنى شرف كوهية من مصر

الهام حسني شرف كوهية
جمهورية مصر العربية
قصيدة عامية بعنوان (أنا المدبوح)
ليلي يا ليل
قمر بيغني مواويل
ويفضل صاحي للصبحية
وانا عيوني بتتكلم لكن عايشة كده ف سكرة
بحب بجد لكن ما اقدرش اكون غايبة عن المساكين
بتوه في الزحمة وياهم وانا منهم بقالي سنين
واحس بكل ما فيهم أنا فيهم منين رايحين
ويهتف صوتي ومعاهم في وقت الجرح بهواهم
لكن فيهم بيسمحلي أكون روحه اللي تتكلم
ويشكيلي ضنا حبه وصوت دمعه كأنه أنين
تقوم شكواي تتألم وما احتاجش اني أتكلم
وقلمي يرسم الشكوى غنى العصافير
يقوم ينسى حبيبه ف لحظة
لكن فاكر ملامح شوقه
يا شوقه
بلابل في السما بتطير
حبيب جاني بيشكيلي ويحكيلي
وانا بسمع لكن سمعي يروح لبعيد
لحد هناك
أنا وياك بروحي وقلبي بسمعلك
أنا جنبك
لكن طايره بطير أبابيل
عشان ارمي عزول الشوق بكل هدوء
وبسمحلك تكون جنبي في وقت السكرة للمعشوق
وبندهلك عشان الجرح سابقني
عشان جربت اكون مجروح
معايا انت دوا جرحك وانا المدبوح
وعايش جوه موج مسكون بصوت أنغام بتتألم
أنا هو وانا هي وانا وانت لازمنا نبوح
لكن خوفك على خوفي على خوف اللي ساكن قلبي جوايا ومش مألوف
سنين بتعدي من غير خوف
هنرجع للقمر يحكي حكايتنا
يقول إمتى بدايتنا
بداية كلها أوهام
وبتسميها على كيفك
لكن من ضمن أحلامي وأحلامك وأيامي وأيام وأيامي
أنا وانت غلبنا الشوق
هناك صورة بترسمها عيون كل اللي شافونا بنتحاكى
يا بخت اللي انكتب شوقه على جبين اللي حبينه
وداير في السما يتلاقى ويا الطير
يشوف الغير لكن غيره ما بيشوفهوش
عشان طاير بريش عصافير
يطير عصفوري حد وصولي للجنة
ويقطفلي عبير زهرة بلون وردي
أقابله بابتسامة وشوق
وبطلع فوق
أنا اللي عيوني تندهله يلبي ندايا والبس طوق
وفستاني اللي فيه حباية شكل اللولي تعكس ضوء
تنور كل آمالي وراحة بالي تحلالي
وغنيوة أمل بكرة بصوتنا العالي بتلالي
وكف إيديه بيسلم ويتكلم عن الحلم اللي جاني وراح وعشته براح
حبيبي يا أنا شفتك لكن إنت ما بتشوفنيش
تعيش جوايا لكني حرام بيك اني أعيش

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى