انا المصرى *عاميه*أحمد الحارونى مصر محافظه الاسكندريه انا المصرى انا الانسان انا الماضى وانا الحاضر وانا الحق اللى عمره فى يوم ماكان باطل وانا الغلبان بوش بشوش بيضحك حتى لو زعلان وبتحمل مرار عيشتى وبسجد شكر للرحمن فى قوتى حصة للمسكين ولو حتى هبات جعان وبعمل حق للعشرة و للجيرة ووقت الفرحه تلاقينى ووقت الشده بردو كمان واحب الخير لكل الناس وازعل لما اشوف تعبان وعمرى فى يوم مابتلون وعمرى فى يوم ماكنت جبان وصوتى فى الحقوق عالى وعمره فى يوم ما كان بهتان ودايما بنصر المظلوم واضحى بروحى علشانه ولو حتى هاروح فى لومان ومتربى على مبدا بفعل الخير تملى ابدا وحسن الظن مصاحبنى مليش فى اللف والدوران وبعشق لون تراب بلدى وجيشها حتة من قلبى يارب احميها واحفظها ويرجع خيرها زى زمان
