ط
الشعر والأدب

إعتذار .قصيدة للشاعر / طه ابراهيم

طه ابراهيم
إعتذار

@@@@@@@

بعد غيبه وانتظار

كلنا بعد الفطار

قاعده حلوه جمعتنا

م العشا لحد النهار

كل واحد قال كلامه

والحديث كان بختصار

الكلام مليان شجون

واللي يغلط اعتذار

والهدوء والجو صافي

هو ده طبع الكبار

والعواطف راحه جايه

والتسامح كان شعار

مره جد ومره لعب

ومره يقلب ع الهزار

كل واحد قال كلامه

ساعة واشتد الحوار

اللي شكك في النوايا

واللي هدد بالفرار

واللي لخبط ف الكلام

واللي عايز اعتذار

مره واحده القعدة سخنة

زي ما يكون انفجار

واللي قال الدنيا باظت

واللي بشّر بالدمار

واللي لمح بالخيانه

واللي حاسس بانكسار

واللي ساخط ع السياسه

واللي رافض للحوار

واللي صوته عالي جدا

جوه عينه فيها نار

العرق علي وشه باين

والبياض يقلب حمار

والغضب عم الجميع

والحليم والحر ثار

والشتائم رايحه جايه

والمبادئ في انهيار

والشيطان عمال يحوم

ثانيه واحده الوقت طار

كان ساعتها الديك بيدن

والمؤذن ف انتظار

كنت نفسي ساعتها اصرخ

صرخه عاليه ف كل دار

النهرده احنا اختلفنا

والخلاف هو الشعار

قولي بس ازاي هننجح

والقلوب فيها المرار

كل همك تأذي جارك

أو …. تعامله ….. بحتقار

أو تشوف الدم سايل

والمجازر ليل نهار

هو فين راح الحنان

والمشاعر ف إحتضار

كنت عمي وكنت أخويا

كنت صاحبي وكنت جار

كنت لما الليل يضلم

تلقي شمعه في كل دار

كنا عزوه وكنا أهل

والبيوت فيها العمار

واللي يقتدر كان يسامح

شعب طيب بقتدار

النهرده الناس بتظلم

والضعيف محكوم بنار

نفسي نرجع تاني أهل

واللي يغلط إعتذار

المحبة طريقها سهل

والعداوة صراع دمار

@@@@@@@@

بقلم // طه إبراهيم

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى