ط
مسابقة الشعر العامى

الأم ..مسابقة الشعر العامى بقلم / نصر سليمان محمد من مصر

مسابقة العامية
نصر سليمان محمد
محافظة الاسماعيلية – مصر
01221569270
“قصيدة الأم ”
“الأم”
قالوا يا شاعر قصدينك في احتفالية .. تكريم الأمهات وتتويج المثالية
اكتب لنا قصيدة بأبيات شعرية ..وزن ولحن.. وكلمات شجية
خدتني الشجاعة ..وافقت.. قصيدة شعر عادية ..كاتب قبلها مية
****
أخذت ركن بعيد وأوراق ومقلمية .. وفنجان قهوة ساعة مغربية
بعترت الحروف الأبجدية ..وجَمعت معاجم اللغة العربية
استعنت بشيطان الشعر… يلهمني البداية والافتتاحية
ضحك بخبث ..وقال… إيه حكايتك معايا ..نسيت ..أنا للغواية
فاكرنى ملاك من الجنة… دا أنا حتى عفريت ابن جنية
الأم مش سكتي .. معاك في كل أشعارك.. إلا القصيدة دية
*****
بديت أفكر في الكلمات المعنية ..عاطفية غزلية ثورية وطنية
احترت وتعجبت ولقيت في الأم المصرية .. كل المعاني اللغوية
****
قلت أبتدي أرص الحروف.. واغزل قصيدة بحرفية
ومن أول كلمة صرخ القلم .. وقال دى قصيدة استثنائية
الأم مش كلمة وحروف ..دي مشاعر وحالة وجدانية
ولو هاتكتب عن التضحية والحنية ..كل الأمهات في القلوب مثالية
أنسى شعرك كله اللي فات ..وقصايدك العمودية والعامية
لملم أوراقك وأدواتك .. وادخل محراب العبودية
ألام واحدة ..الأم واحدة ..وتعددت الشموس والمجرات السماوية
ودي مش مصادفة كونية أو فكرة .. أوتجربة عبثية
دى حكمة رب الكون .. خلق الأم بقلب يسع البرية
*****
زحت القلم ..وطافت بيه الذكريات ..زمن طويل عدى وفات

لما كنت لسه طفل .. أغمض افتح ..اضحك واصقف

وكان الكون دا كله .. الكون دا كله ..هو أمي
حتى بعد لما شبت .. ومن السنين خمسين وستين .. عشت
وكبرت وخلفت .. وكل الناس تقولي ..عَجزت ..شخت
إلا أنتي .. أنتي يا أمي لساكي شايفاني في عنيكي ..طفل
*****
تعنفيني وتنصحيني .. أعمل كبير .. و تاخدني عزة الأيام و السنين ..
أتضايق ..أكشر .. لكن صدقيني مش من جوا دا بس وش
أنا مهما كبرت .. دايما بحس اني معاكي .. لسة طفل
ارمي همومي في حجرك .. وانزل حمل كتافي ..
ومافي غيرك يطبطب .. حتى لوكنت جافي
أنا السفينة في بحرك ..شراعي ياما ومجدافي
وإن يوم الموج حدفني .. وغطت الميه كتافي
مالاقي غيرك منارة ..وحضنك المينا .. وقلب دافي
*****
ما حسيتش إني فعلا بقيت كبير .. لاء .. كهل والشعر شاب
.. وولى الشباب . واد إيه العمر فات .. إلا بعد ما يوم دقيت عليكي باب
مالقيتش أمي في انتظاري .. تضحك تقولي جيت ياغالي
ولقيتها دار خراب .. الدفيء فيها سراب .. والبرد زاد
وكسى السما السحاب .. والريح بقا لها صوت دياب
سال دمع العين . . حمم بركان ..دا ذهاب مالوش إياب
انكمشت .. اتكورت في ركن الدار .. والعقل غاب
وافتكرت أيام زمان .. وتمنيت ارجع لحضنك ..
.. افتح .. اغمض .. اضحك واصقف .. من تاني ..طفل
انتي كل الكون ..انتى كل الكون .. وكل الكون انتى يا أمي
****
وعرفت ليه صرخ القلم .. الأم مش كلمة في قصيدة عدم
هى الديوان هى الحياة والأمل .. الأم فيها كل الصفات تكتمل
الأم أمن ودفا .. شمس وقمر ..الأم هى ..هى الوطن

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى