كل واحد مننا يمشي ف طريق
السكة مش واحدة
و الفرقة اهي فاردة
كفوفها بالوداع
مات حبنا اللى كان فِ يوم
صافي و بريء
و بقينا خلاص ذكرى
و تهنا فِ بحور الضياع
كنت فاكرة إنى ملكت الكون
و انا بين اديك
كنت بهرب من كل العيون
لا يحسدونى عليك
كنت بسرق ضحكتى
من شِفّتى و اهديها ليك
كنت عاشقة و كنت خاين
و الخداع فِ عنيك مداين
كنت بفرح لما أشوفك
بس تضحك
كنت أدارى الحزن عنك
و انت مش حاسس بغيرك
ولاّ شايف إلا نفسك
لسة برضه زى ما انت
كداب و كدبك مِعتليك
إمشي خلاص .. إبعد بعيد
ماعَدش دمعك ده يفيد
مش حا اقدر أنسي ..
منا لازم أقسي
ما انت ياما قسيت عليا
و افتكرت انك شديد
دلوقتى راجع بعد إيه
و ايه دا إللى ندمان عليه
ماعادش باقى فِ الطريق
غير سكتين
سكتنا ما عادتش هى هى
خلاص و لازم نفترق
كان نفسي أرجع تانى ليك
لكن انت خنت و بعتني
جرحت قلبي اللي كان شاريك
و دبحتني
مانا كنت ملكك و بين إيدك ..
و بإديك إنت ضيّعتني !!
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
