ط
مسابقة الشعر العامى

الفجر ف شارع شامبليون..مسابقة شعر العامية بقلم / طارق ابو النجا من مصر

الفجر ف شارع شامبليون
*************
الفجر ف( شارع شامبليون )
والقهوة ف عز الضُهريه

سهرانه الحيرة ف قلب عيون
بتفك رموز الحرية

**
إن خدنا شمال ، نلقى ( التحرير)
والثوره هناك زي م هيَّ
والناس بتعدي ، مفيش تغيير
وانا قاعد مستني ( بهيه )

وبهيه .. ساكنه ف (شارع الجيش )
والجيش ، واخدها نوباتجيه
واستنى تيجي – ف يوم – ماتجيش
ولا فيش أمل ، ترضى عليَّ

واديني ملهي في ( الشيشه )
والحمد لله – أهي عيشه
وح اعمل ايه انا بالتفكير
مدام بهيه مهيش ليَّ !

**
طول عمري بعشقها في سُكات
واملا القصايد ملاغيه

زي اللي عايش في (الكيت كات)
و روحه ساكنه ( المنشيه )

وان جيت في يوم اطلب ودك
يحطوا إدهُم على ودنك
ماتسمعيش ولا أغنيه !

أرجع وانا زي المجنون
واقعُد في قهوة شامبليون
والناس كتيره حواليَّ

بقينا يجي ميت مليون
والقهوة لسه عليها ديون
ومين يفك الرهنية !

**
فيه ناس هنا بتشرب ينسون
وناس تشوف التليفزيون
وناس بتلعب ملهيَّه

والفجر يدن في ( المأمون )
ومدام ( خليفه ) بقى ومضمون
خلي صلاتك جهرية

ياسيدي .. كان الله في العون
أصل اللي قبلك كان فرعون
ولسه صورتُه في عينيَّ

قال لي : ح تسكُن في “البلكوون”
لقيتني عايش في “الكراكون”
مسجون في “شارع الحريه”

**

آخر كلامي .. اعمل معروف
الناس هنا ف (شارع معروف)
ماداقتش ولا يوم حنيَّـه

واللعبه صبحت ع المكشوف
النور طلع ، وبقينا نشوف
أيه اللي ليك ، واللي عليَّ

حرر قلوب الناس م الخوف
تلقاها جنبك واقفه صفوف
واهو يبقى ده ( مهر بهيه )

**

طارق شعبان أبو النجا
الخميس 17 مارس 2016
القاهرة
**

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى