ط
مسابقة الشعر العامى

المواجهة.مسابقة الشعر العامى بقلم / محمود السيد محمود

خاصة بمسابقة مهرجان همسة

محمود السيد محمود

القاهرة

01001061110

” المواجهه “

_________

عاجزة الحروف ..

عن وصف حالك بالتمام

حاسس بحالة إنفصام

حاسس بحالة إنهزام

حتى القلم غضبان عليك

تمسك إيديه فـَ يسيب إيديكـ

فَضحاكـ عينيكـ والخوف ماليكـ

من حاجة أصلاً مبهمة ..

مِستَسلمة فيكـ الحاجات

رافعين رايات الذل من بعد الشموخ

جواكـ شروخ ..

وبقيت تدوخ ..

من نظرة واحدة للسما

يحيا العمى …

يوم ما النظر ..

مَايشوفش ضي الشمس في عز النهار

والضلمة تعلن لانتصار ..

والانكسار .. يدخل سبق

مستني أيه ؟!

إصدِر قرار ..

واعلنها فوراً عـ الملأ

قول ألف لأ .. أصلكـ جبان

سيب الميدان كُلكـ عيوب

ميت ألف عار ..

إنك تحارب وانت مش قد الحروب

الحل دايماً للنعام وقت الخطر ..

هو الهروب

إنفد بجلدكـ وقتها ..

وادفن دماغكـ في التراب

واوعى السراب ..

يِلهيكـ وتنسى جتتكـ

طب مين هَايستر عورتكـ ؟

وابقى افتكر إن الغراب هو البطل

أيوه الغراب هو البطل ..

وقت امَّا دارى سوئتكـ

يا حسرتكـ مليون آسف على حضرتك

على عمر قًضّيتُه هباء

والانحناء مكتوب عليك

فـَ مفيش مفر والمُستقر

يوم ما القدر يكتب نهاية قصتك

يومها الندم مش راح يفيد

والمستفيد هو الزمن

ماهو ياما عد عليكـ ساعات

إنسى اللي فات ..

لحظة رجوع الوقت تاني مستحيل

ولا فيش بديل ..

ما انت الـ ضيَّعت بإيديكـ كل الفُرَص

واخترت مـ بين الخيول أعجز فرس

وراهنت إنكـ راح تفوز

عشمان ..؟؟ يجوز !!

بس العشم محتاج حُظوظ

حلمكـ دا كان يمكن شباب ..

لكنه لابس للأسف توب العجوز

من غير دليل ضَل الطريق .

خليكـ جريء ..

بُص فـ مرايتكـ بالساعات

قضّي بقيت العمر قدامها ..

دقق قوي

يمكن ملامحكـ توحشكـ

يوم ما الزمن يحفر عليها بالسنين

وتعيش سجين خلف قضبان النصيب

والهم ينسج من خيوط الذل فوق بشرتك بيت مـ الوهن

وساعتها بس تحس إن الموت سبيل

يا أيها الرجل النبيل ..

جَهز متاعكـ للرحيل

فات الآوان ..

كل اللي فاضل مـ الزمن حبة فُتات

تلحق تلملم ما تبقى من بقايا الذكريات

واستنى قطر الموت وحاسب ينصرف

كفاياكـ خَرَف ..

بالنسبة ليكـ الموت شرف

أو حتى منحة من الآله

أفضَل ما تبقى بدون هدف

محسوب على قيد الحياة .

 

#محمود_السيد

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى