انا المصرى اللى عاش عمره بيتّريق و بيلاغى ف خلق الله و بينكت و يتفكّه و لو دورت فى جيبه ما هتلاقى ولا مجمد ولا فكّة و انا اللى شلت هم الدنيا فى قلبى ولا بابكى ولا اتشكّى و انا اللى باشرب المية بانواعها ف اول نقطة ف لسانى اقول مضروبة او… ماركة و باسمع سومة ف الاطلال و باسمع برضو اورتيجا و .. معاه … اوكّا و انام احلم بتوبة و البس الابيض و اروح … مكّة و انا اللى م الهموم كليت ما لاقى للفرَح … سكة و ضهرى م الوجع مَهرى لا يتحمل عصا تنزل ولا كرباج ولا يتحمل الشكّة انا الشاب اللى عايز يبتدى عمره و كل الدنيا فى ربكة لا فيه شغلة ولا شقة ولا … شبكة انا الصياد طلعت البحر اترزّق و شايل ع الكتاف … شبكة قالولى دا السمك هاجر و ما فاضل ولا …. سمكة انا الفلاح بدرت البذرة فى ارضى و مستنى تعود المية من تانى قالولى جايّة ف السكة و ادينى لسة مستنى باغنى للولاد غنوة و انا قاعد على الدكة و باحكيلهم حكاية نيل بيروينا و هاملينه و بالاهمال بيتلوث و صار … بركة انا العامل و فى ضل المكن بارتاح و اكمل نوم مكان هادى لا فيه هيصة ولا … دبكة انا سواق و فوق كل الطرق ماشى و شايل عمرى فوق كفى عشان مرهون على … تكّة اسوق ساعة و اقف اسبوع عشان الدنيا مش… سالكة انا الزبال انا مش جاى و مش شغال زبالة كتير اشيلها ازاى و بيقولوا دى راح تتشال دى ناس جايّة من الخانكة و انا اللى قمت بالثورة و مش منى دى فكرة جايّة من برة و يتنحى ف ليلة م السواد … حالكة و تيجى ايام و ليلها ف السواد احلك اقول يمكن تكون … وعكة و فرعون من وراه فرعون و ف الكرسى مسك … مسكة و جالنا اللى يضيعنا و يجرحنا و فوق الجرح يتكّى و مش فاهم و عاكك ف الكلام … عكّة و عامل انه 100 فارس و فاتح900 ….. عكا عشيرة من زمن عنتر و حابكين كذبهم … حبكة و تتعب م الكلام معهم عشان القافية مش … حابكة و يستولوا على حالنا و محتالنا و صرنا و البلد … تركة و مافى جديد راح افضل برضو انا المصرى انا اللى الدنيا عاميانى و راميانى و ظالمانى و فارمانى و حارمانى من الضحكة و انا اللى الكل بايعنى و انا اللى البحر بالعنى انا اللى السم قاتلنى و انا اللى القطر واكلنى و تحتو باتدعك … دعكة و انا المصرى اللى بيلاغى ف خلق الله و بينكت و يتفكّه و لو دورت فى جيبه ما هتلاقى ولا مجمد ولا … فكّة انا المصرى …. انا المصرى
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
