ط
مسابقة الشعر العامى

بنت الآمل والصبر .مسابقة الشعر العامى بقلم / عبداللطيف أحمد شاش 

الأسم / عبداللطيف أحمد شاش
الأسم على الفيسبوك / عبداللطيف أحمد شاش
محافظة الشرقية – مصر
رقم الهاتف والواتس / 01157386794
خاص بمسابقة شعر العامية
بعنوان / بنت الآمل والصبر

رميت الماضى ورا ضهرى
وقولت أعيش
فتحت الشيش على الأخر
يجوز أعرف ألاقينى
بصيت بعينى
لم أرى شئ
بصيت بقلبى شوفتنى بضحك
ما فيش فــ الرحلة ما يوحى
بإن الدُنيا تستاهل
عافرت بحاول أملكها
قالت لى الحكمة يا جاهل
مين يقدر يعيش فيها خلّى البال
عشان يملك
ومين يسفك دِما الأوهام
غير عوزك
ومين بيخسّرك فوزك
سوى ذاتك
ملذاتك
وكلمة حق لو تخشى تقولها لحد
فتتقال لك
وتتقل لك
وتتقل بك تعيش غرقان
ما فيش فــ الدُنيا دى أنسان
بيتحايل ع الوجع ييجى
ولا إيديكى
– ياطول التجربة الصادقة –
هتغزل فــ البداية نعيم
ولا التسليم
هيمنع روحك الشاردة
تساير خوفك الأزلى
ولو عسلى عيونها يندهلك
ما تستعجلش
عشان الوهم فى خيالك
ما يتشكّلش
براح كداب
بدون ما تحس يتحول
وجع وعذاب
يصاحب كل أحلامك كأنه نديم
فلو صادفت قابلت لئيم
ما تعرّيش أحاسيسك
كفاية تقيد فوانيسك
لكل الخلق فتعدى
وسيب منك حاجات ياما
تشوفها الناس بلون وردى
فلا حُزنك فى وش الأزمة
هيحوشها
ولا عروشها
– بنت الآمل والصبر –
هتقدر تمحى تصنيفك بشر فانى
ما دام عايش
هتتمرجخ ما بين العالى والدانى
وهتعانى
لحد ما ينكتب لحدك
ساعتها تحس بالراحة
عشان تبدأ طريق تانى
لكن وحدك
صحيح الوهم كان واخدك
لكون واسع
براح شاسع
لكن واقع
لابد تفوق له وتصحصح
ما فيش كمبارس ع المسرح
بيأخد دور سوى دوره
فيعجب كل جمهوره
مادام راضى يعيش الدور
وفاكر إنه بيمثل
دا دورك بكرة يتفصل
بإيدك مش بإيد غيرك
لإما تعيش بتفكيرهم
لإما تعيش بتفكيرك
وأنا قررت
أرمى الماضى ورا ضهرى
ومش هاكل زمن بايت
وأشوف الدُنيا من منطق خلاص هانت
ولو بانت فى نن عيونها تكشيرة
هضحكّها
وهضحك ليها
وأتمقلس على خدودها ومكياچها
اللى زاد جداً عن المعقول
وهفضل أقول
ما فيش داعى نعاند بعضنا على طول
أو أعشق فيكى ترمينى بعيد عنى
أو ألعنى
عشان قررت أهديكى براح فيّه
كفاية تمُرى من جنبى
– بدون سحرك –
عشان النظرة فى عنيّة
ما تفضحنيش
يا دُنيا تحبى تتحبى وما تحبيش
أنا قررت إنى أعيش
بضحكة بريئة هرسمها على وشى
بحبة صبر أهو يمكن يصون عشى
بروح تانية بعيدة كل البعد
عن روحى
بأملى فى بكرة وطموحى
ببوحى
لما الصمت يلدغنى فأشوفنى بجد
وأشوفك وأنتى بتسيبى أخر جزء فى براحى
وأشوفك ضحكة فى صباحى
بتفتح قلبى زى الشيش
وبتقول لى
أرمى الماضى ورا ضهرك
وأبدأ عيش

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى