ط
مسابقة الشعر العامى

بنوتة حلوة ..مسابقة شعر العامية بقلم / عبد المنعم طه من مصر

مسابقة مهرجان همسة ( الشعر العامى ) 2016

عبد المنعم طه مصر / الجيزة 01128389798
[email protected]
قصيدة ( بنوته حلوة ) — شعر العامية
—————————————
بنوته حلوه بتبتسم ْ
خطوتها بتضم الحياهْ
شابكه ايديها ف ايد حبيبها اللى اتولد جواه صباهْ
ماشيه بتغزل فرحها من ترحها
بعيون صبابتها وضياهْ
ضحكت لعين الشمس لما نورتْ
من بين ضحاهْ
مدتْ ايديها
تقطف الوردة اللى على جبين القلقْ
وتعيد زمانها اللى ف يوم منها اتسرق ْ
ولا كان هاممها وقتها إلا رضاهْ
فتح الحبيب حضنه وقلبه اللى سبقْ
فتح الحبيب عمره اللى من فتره انغلقْ
طبطب عليها برمش قلبه وضللتْ
يومها عليها بفرحها
ضحكة سماهْ
نسجت بايده ع المدَى
مِيتْ حلم وردى
صنعت سفينه من الأمل علشان تعدى
بس الحياه هى الحياهْ
لما الاحبه بتزرع الاشواق ما بينها بيحصدوها
اما البشر لما بتدخل ف المحبه بيفسدوها
و ادى الحياه هى الحياهْ
دايما تفرّق أو تقرّبْ
أو تصالح أو تغَضّبْ
أو تفرّح أو بترمى جوه بير من حزنها
فين منتهاهْ ؟
مال النسيم يلعب بموج البحر وف لعبه عجبْ
يرفع ف موج ويهد موجْ
ويثور ويهدا بدون سببْ
فَرَدِتْ شراع من شعرها
ملهوفه تحمى اللى عشقها وروح حياتها وعمرها
نفخ الشيطان نفخة غضبْ
و ف لحظه لمّتْ شعرها من ذعرها
غرقتْ سفينتها بحبيبها
بس هى مش معاهْ
—————————————

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى