بيكيا .. مسابقة شعر العامية بقلم / نور الدين رمضان ابوزيد من مصر

بيكيااا
لبواقي الحب المرمية
لبواكي الحزن المركونة
لساعات بتدق على الفاضي
من فوق شباك البلكونة
إتخلص من كل الماضي
والعمر المرمى ف كرتونة

بيكيااااا بيكياااااا

يا بتاع البيكيا.. انا عندي كلام –
وانا شاري يا بيه كل الحكايات –

سبحان من خلق البشر ألوان
الشكل واحد والطبع فيه اختلافات

والدنيا دُنيا عمرها ما تعلي
طول ما بتفْوّل بنزينها م الخلافات

لحظات كتير بنعيش عليها سنين
وسنين تعدي كأنها لحظات

وناس تفارق زي أول يوم
وناس فراقها بينتهي بأزمات

وناس نزهق م الكلمة وياهم
وناس نعشق لو كترت الكلمات

وناس ماتت مع إنها عايشة
وناس عايشة مع إنهم أموات

بيكياااااا بيكياااااا

يا بتاع البيكيا.. نصيحتي بكام؟
بالكيلو يا بيه.. مش بالكلمة

يا أيها الناس
اسمعوا وعوا
كل شئ يتقال لكم
كل حد يحبكم
كل غالي في قربكم
كل واعظ كل ناصح
كل درويش أو ولي
كل من في الأرض سارح
أمره تافه أو جلي
كل شافعي كل مالكي
كل داعي حمبلي
لو سمعت اكتر ما تحكي
لو دعيت من غير ما تشكي
لو عصيت.. في التوبة أبكي
تلقي همك ينجلي

بيكياااااا بيكياااااا

يا بتاع البيكيا انا همي تقيل –
احكيلي يا بيه.. والرب كبير–

مع سبق الإصرار حبيتها
وبروح الروح انا سميتها
وناديتها عشان ما تكون جنبي
وفي قلبي رميت أساسات بيتها
وسابتها وسابت أحلامي
سافرت ع الاخرة .. وسبّتها
والسبّ ده صوت وجع العاجز
والعين مشتاقة لرؤيتها
والقلب يدْمّع ينعيها
والعين تلاقيها راحت باكية

بيكياااااا بيكياااااا

يا بتاع البيكيا.. بتاخد نعي –
الرزق يا بيه.. بيحب السعي –

أيها الراقدون تحت الثري
هنيالكوا
لقيتوا الراحة في الآخرة
يا ريت تقولولنا عقبالكوا
دخلنا الماتش متأخر
و ع الدكة لقينا آلاف
وفاكرين الحياة جاية
لقيت كل البواقي عجاف
وصابني الهم في ضلوعي
ودرع الفرح كان شفاف
وم الإنصاف.. أقول الحق
حياتنا ماشية زق ف زق
وكدب الناس على وشوشهم
يموت الجلد من خوفهم
يداروا السمّ في جحورهم
حياتهم كلها في الشق
ف عادي إني احسدكوا
هنيالكوا
لقيتوا الراحة في الآخرة
يا ريت تدعو نحصلكوا

بيكياااااا بيكياااااا

يا بتاع البيكيا… استناني –
استناك ليه وانت مبتبعش –

قالوا زمان وقت اللّقي
لحظات مبتطولش
إن طال لقاه أو قل
صدقني مبتفرقش
ده لأنه جوايا
وإن غاب كتير عني
لساه هنا معايا
لساه في احضاني
استني يتأخر
والضهر متكسر
والوش بيكشر
والضحكة بتعاني
وانا لسه عشمان في السنين
خلصت في الصبر الأنين
وكسبت كاس الموجوعين
وتعبت من كتر الشقا
القرب تايه م اللقي
وانا لسه على وعده القديم
وعد الصبا.. ساعة رضا
متحني بالشوق والحنين
الصبر طعمه في حلقي مر
والحر كل كلامه دَين

دبرني قولي إزاي ابيع؟
و اوعاك تقول ما اعرفش
خيالها لسه قدامي
وطيفها عمره ما فارقش
واعذرني أصل انت الوحيد
أحكي…. ومبيزهقش

بيكياااااا بيكياااااا

حد بايع.. نشتري
وعد راح نسمع كلامكوا
قبل ما نرّوح نوينا
إننا نخفف الآمكوا
بكرة جاي الدور علينا
دورنا بكره هيبقي دوركوا