ط
مسابقة الشعر العامى

حكاية عم امين ..مسابقةالشعر العامى بقلم / مصطفى سعيد من مصر

مصطفى سعيد ( مصر )
01147110498
مسابقه الشعر العامى
حكايه عم أمين
……………..

مظلوم فـ حياتى وعايش
عايش متهان من الناس
منا كل ما أقرب منهم
بلقى إن خدى مداس

شايفين إننا طيوب
رامين ع راسى الطوب
ولا حد حاسس بيا
واهو كل شعورى الخوف

بحلم فـ الحلم وخايف
خايف من كل البنى أدمين
وبقول بكره أكيد أحلى
وأرجع وأكدب عم أمين

مهو قالى أكدّب كل الناس
وأصدق كلمه بس حبيبتى
وأقفل ع قلبى بـ 100 ترباس
وأبنى وأطور بس مدينتى

فـ مشيت فـ طريقى جنب الحيط
وسمعت لكلام البنى أدمين
فـ لقيت كل حياتى بتتلغبط
فـ رجعت أكلم عم أمين

ورجعت حكيتلوا حكايتى زمان
من قبل ما يقولى حكايه الناس
فـ سمعنى أكينوا ما سمعنيش
وقالى يا إبنى خدنى أساس

منا كنت فـ يوم زايك بالظبط
وحكايتى ديوان ع كل لسان
أوعى تفكر إن فـ يوم تغلط
وتعيش الدنيا كده بحنان

الناس يا إبنى مش زاى زمان
بتصون العهد فـ كل مكان
الناس عماله بتضحك ع بعض
والقلب الطيب ولا عمره يبان

مبقولكش تكون شرير
ولإنك تبقى من الخايبين
ولا حتى تجيلك لحظه تفكر
إنك تبقى من الخاينين

أنا بس هقولك أزاى هتكون
هتعيش الدنيا بقلب أمين
بس مش لكل البنى أدمين
وأسمع لكلام عم أمين

فـ أنا هاخد من وقتك فترات
هتكون جواها تعيش لحظات
هتبين وقت ما كنا رجال
وقت ما كنا ثابتين خطوات

أنا كان حلمى بحلم الناس
حلمى بسيط لكن منداس
إن أعيش أشوف الدنيا
وإن مكنش شخص كفيف

فـ أنا كان حلمى حلم الجيل
بس فى ناس خايفاها تميل
فـ نزلنا قطعنا الأميال
ونسطر تريخنا لأجيال

فـ أتجمعنا أنا والناس
كده ع نفس الإحساس
وإتزاحمنا بالأكتاف
وصوتنا علا بالإنفاس

علشان ننطق كلمه حق
علشان نسقط عيشه فرض
وكان الكف بيضرب كف
وكانت الرجل بتضرب أرض

وكان جنبى أب كفيف
مع إبنه اللى معلق عريف
ويانا بيهتفوا بالحق
بصوت واحد للظلم لا

ولا خوفنا من صوت البوق
ولا خوفنا من شعله نار
ولا خوفنا من أمر نظام
وهتفنا إننا أحرار

فـ مشينا كلنا فـ طريق
مع بعضنا الإيد فـ الإيد
ومشينا كلنا نتحدى
مفرقش معانا حديد

فـ هتفنا كلنا أرحل
فـ هتفنا للحق يثور
فـ هدفنا كلنا نقدر
نشوف بعنينا النور

فـ أنا شوفت الدنيا بتتروق
وشوفت حبيبتى بتتزوق
والناس حواليا فـ روقان
ولا عمرى فـ يوم هبقى جبان

وهتبقى مدينتى الأول
وهخطط مستقبل أجيال
وهرسم لوحه المستقبل
لوحه يتوارثها الأجيال

لوحه معموله علشان بكره
لوحه بدم الشهداء
لوحه بتدى الجيل دفعه
لوحه بتدى الشاب نداء

إنوا ميخضعش فـ يوم للباطل
ولا يردى إنوا يعيش متهان
ولا يمشى فـ يوم حوالين الظاهر
وهوا حياته أساسها توهان

فـ نصحتى ليك بس يا إبنى
إنك تتحقق من الباطن
وإنك متفكرش إنك تزعل
من ناس صدقتها بالظاهر

وإنك لو فكرت فـ يوم ترجع
راح تلقى ولادك فـ الذل
ففكر قبل ما أيامك تمر
وتلقى حياتك وولادك من مر لـ مر

فـ لو راح فـ يوم منك حلمك
دوار جواك ع حلم جديد
ولما تفكر فـ يوم ترجع
أرجع وياهم الإيد فـ الإيد

جمع حواليك الناس وأعرف
إن الدنيا مش للخوف
ياتسود العالم وتكون فارق
ياتسيب الظلم يطوف

وأصبر ع دنيا مش ديمه
وأعرف بإن الحق طموح
لو إتكسر عمرك ما هتعرف
تعيش فـ حياتك مبسوط

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى