خطوة عزيزة .قصيدة بالعامية بقلم / فتحى الحصرى

ليه مستعجل ليه قلقــان
هيا الدنيا خلاص هاتطير
إحنا ياروحى لينا زمـــان
ماقعدناش مع بعض كتير
إنت منور أنــت مآنــس
وانا والله بحبك خالــص
وما باشوفك بانسى الدنيا
مابقاش عايز افارقك ثانيه
هافضل اقوللك خطوة عزيزة
ماتخليك ويانا شــويـــة
*********
إحنا حبايبك وانت حبيبنا
واللى يصيبك برضه يصيبنا
عايش دايما جوه قلوبنا
حتى ولو فكرت تسيبنا
ليه مستعجل ع المرواح
لسه الوقت معانا براح
ليه مستخسر فيا ثوانى
دا انا قلبى ماصدق يرتاح
عايز احكيلك عن احوالى
مش راح اخبى مش راح ادارى
وازاى ادارى وانت حبيبى
وانت اللى بقوللك اسرارى
دانت منور إنت مآنس
وانا والله بحبك خالص
وما باشوفك بانسى الدنيا
مابقاش عايز افارقك ثانية
هافضل اقوللك خطوة عزيزة
ماتخليك ويانا شويه