ط
مسابقة الشعر العامى

خليكى شاهدة ..مسابقة الشعر العامى بقلم / معوض حلمى من مصر

“” خليكي شاهده “”

عامله نفسك
يادنيا ناسيه …
وانت طبعك
معايا أسيه …
طب انصفيني
مره واحده …
وخليكي شاهده …

إني صابر
وبصد عنها
م المخاطر
أي غادر
يبيع ترابها
لأي تاجر
خليكي شاهده

قلبي عمره
يوم ماخاف …
رغم اني
عايش ع الكفاف …
و بالمناهده …
خليكي شاهده …

حبيبتي برضه
معايا أسيه …
ولأني واد
طبعي أصيل …
حبيتها حب
مالوش مثيل …
دا النهر فيها
سلسبيل …
طارح ف قلبي
عشانها ورده …
خليكي شاهده …

لا ليا فيها
شوال فلوس …
ولا قصر عالي …
هدمتي
على قد حالي …
ولقمتي
بتكفي طقه …
وطقه لأه …
خليكي شاهده …

ع الطريق
دايما مسافر …
والدمعه نشفت
ف المحاجر …
والحنين
خلى المشاعر …
ليها قايده …
خليكي شاهده …

حبيبتي
على
مر الزمان …
ساكنه روحي
والكيان …
ولا عمر قلبي
مره خان …
عهدها
ولا مره باعها …
خليكي شاهده …
خليكي شاهده …

~~~~~~~~~~~~~
بقلمي ..
معوض حلمي شاعر عامية
منشأة بطاش
تمي الأمديد
دقهلية

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى