ط
مسابقة الشعر الحر والتفعيلى

خَاينْ العَهْد..مسابقة القصيدة النثرية بقلم / محمد جمال السيد محمد فضالي من مصر

الإسم/ محمد جمال السيد محمد فضالي
الدولة/ جمهورية مصر العربية
العنوان/ الشرقية – فاقوس
البريد الإلكتروني/ [email protected]

خَاينْ العَهْد

مِستَنِي إيه من اللي باع عَهْدَك وخان
قليل الأصل لا تلومه ولا تعاتبه مهما كان
مادام عيشَك ومَلحَك عليه في الدنيا هان
ولْحُر وَعْدَك بينك وبينه ما صان

هحكيلكم حكاية حصلت في هذا الأوان
قصة بين اتنين صحاب في شعبان
القصة دي الجاني فيها واحد أُلعبان
أما المجني عليه راجل شريف يشهدله الزمان

الجاني جَنَىَ جنايته والقانون عنه عميان
جَنَىَ القانون ع المجني عليه الشريف الغلبان
برغم إن الحقيقة الكل ليها عَرْفَان
صار الشريف يمد إيده لمساعدة السَّهتان
بيحركه أصله الطَّيب وقلبه بالخير عمران
مِنين ما يمشي الرضا على وشه بيبان
أما الثاني فمتقفله في وشه البيبان
تعالوا نشوف إيه اللي حصل لشعبان

في مَرَّة من المَرَّات وفي زمن من الأزمان
جه البعيد عض الإيد اللي اتمدتله زمان
نِسِي كل شئ بقى عم السرحان
بَدَلْ ما يشكر ويحمد ويقدم العرفان
راح.ساب الشر مكانه.فَضَّل النُكران

أصل ده أصله في الحياة ثُعبان
لا له عهد ولا وعد ولا أمان
ياترى العيب فينا ولاَّ في الزمان
صَبَحْ القوي ذو السلطان كله إيمان
أما الضعيف صَبَحْ سخيف بقى شيطان

إحنا في زمن الطَّيب مالوش مكان
وانت ياصاحبي جَدَعْ وابُو الجدعان
نام وارتاح في نومتك يابو الشجعان
صدقني اللي باعك مريض بمرض النسيّان
ماشي بين الناس عادي ولا ندمان
فاكر إنه بكده ملك وأبو الفرسان

طب إزّاي.جَتُه ميت عَفْرَة.شتّان
عايش طول عمره عويل بداء الحرمان
لا يوم اقتنع وقلبه بالشر مليان

وآه من النفس لو صاحبها جبان
النفس أمّارة بالسوء ومالكها عقله فلتان
ناره بتحرق غيره أمَرّْ من البُركان
سيبك من الهوى دا آخرته الخُسران
واللي يمشي ورا هواه خَسران خَسران

أصل اللي يموت ضميره يصْبَحْ عريان
يعيش منبوذ والأدب عنده تملي ف نقصان
أكيد بكره ينكشف أمره ويعيش هربان
يقضي حياته بالعذاب وفِكْره بالعقاب حَيّران
ماهو ديل الكلب ميتعدلش ولو بالميزان

صدقني.جاي الوقت اللي يتْبَدِّل فيه الكتمان
راح يظهر من قلب العتمة ألف شمعدان
آن الوقت ولا ما آن انت ربحان
أخاف أظلم الزمن ويّانا أكون غلطان
العيب مش عيب زمن.عيب إنسان
صفة الرجولة مش للكل يا جدعان
الرجولة أدب.أخلاق.عهد ووفا كمان

أيا عدالةَ الأرضِ أوقتكي ما حان
حان أو لم يحن.. الله المستعان

إطَّمِن يا أسمى نيشان يا أقرب الخلان
إطَّمِن ربك بِيْخَلَّصْ إطَّمِن مَتْكُنْش زعلان

إنت عند الملك العدل حقك منصان
حقك محفوظ بنص السُّنَّة وآيات القرآن
حقك محفوظ بكلام الله في الفُرقان
إنت في مكان خالي مِن العُدوان
المحكمة الإلهية محكمة الرحيم الرحمن
الحق منطوق لسانها..العدل هو العنوان
مستني ايه من اللي باع عهدك وخان
قليل الأصل لا تلومه ولا تعاتبه مهما كان

***
* وردت كلمة شعبان في القصيدة مرتين، الأولى لتدل على الزمان، أما الثانية فهي جاءت كإسم علم.

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى