الاسم : محمد محمد الساعي
الفئة : شعر العامية
البلد : مصر
ت : 01284199202
#درويييييش
مفتتح
ومنين هاجيب م الكلام ..
كلمه توفيكي
كل الكلام بقى عادي .. مستهلك
القلب حبك حياه ..
والعقل تاه فيكي
وانا اللي دون البشر ..
وحدي اللي مستاهلك
****
درويش في ساحة حضرتك
قابل اكونلك ندر
او حد م المريدين
وبخور عنيكي الطيبين
توَّهني في السكه
ودفعت حقي م اللي فات
عربون لمحاسيبك
وحلفت ما حاسيبك
وسنين حياتي مضت
والباقي كان فكَّه
يا سكتي لمكه
ودليلي ان العاشقين متجمعين..
دروايش
ما اقدرش تاني اعيش
الا ف رحاب ضيِّك
يامو العيون حكايات
مالقتش يوم زيِّك
وان كنت مَيِّت في عيون..
كل البشر..
يكفاني اكون حيِّك
****
قنديل على قُبة مقام العاشقين
حالف بكل الاوليا …
والعارفين
لانفض تراب هَمْ السنين
واملك مفاتيحك
واغزل حروفك كلمتي ..
وأداواي .. مجاريحك
قلبي اللي دايب م الفراق
وسابني وجا ريحك
وفضلت انا طريحك
عشقان لحد الحد
دا هواكي جزر ومد
عاشق تباريحك
سبحه بطول مشاويري لرحابك
خطيتها طول رحلتي
حبايه … حبايه
ووقفت على بابك
وعشان ما ألمح في يوم
عبايتك الخضره
قابل اكون درويش
بيجَهِّز الحَضْرَه
