ط
مسابقة الشعر العامى

رافضه أكون مسابقة الشعر العامى بقلم / امل صيدم من مصر

=============رافضه أكون=========
=========================أمل صيدم
ما أعرفش أمثل
ما أعرفش أكون
شخصيه غير شخصيتي
أنا ماشيه دايماً ف الحياه
مش حاسبه أبداً خطوتي
ولا عمري قلت لبكره
يجي بدري يوم
ولا عمري بصيت يوم ورايه
ماحسبتهاش يوم بالسنين
أنا عمر فكري ألف عام
والقلب كا لطفل الجنين
الذكريات بتمر زي شريط
ف بالي
ودموعي تنزل فوق خدود
وش الليالي
خبتها عن أقرب قريب
حتى الحبيب
رافضه يشوف يوم دمعتي
الشمس تشرق فوق ملامحي
كل صبح
بيقولوا عني
اني عنيده
رافضه منهم أي نصح
رافضين أناقش فكرهم
حاسين بإن الفكر حكر
ورأيهم هم الصحيح
عايزين يكونوا شيخ طريقه
لفكرهم أبني ضريح
أنا في الحياه
اعصار قصاد كل المحن
ولا مره قدرت
تغلبني ريح
قلبي الجريح
مليان هموم من عمر فات
كتير سكت على الزمن
وزهقت من كتر السكات
قررت أغير
كل ما مر ف حياتي
وادبح سكاتي
قررت أكون
قررت أبروز ذكرياتي
وأحطها ف معرض كبير
يمكن تكون ف يوم آثار
فيزور رفاتها ناس كتير
قررت أصالح دنيتي
أنا رافضه أكون
حد غيرشخصيتي
————————-
أمل صيدم

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى