ط
مسابقة الشعر العامى

زحمة ..مسابقة العامية بقلم / عبد الرحمن السيد من مصر

عبدالرحمن السيد – مصر
شعر عامــّي، بعنوان: زحمة

ف عين الناس بشوف زحمة..
ف عين الناس بشوف الناس
في ناس تدي الفلوس رحمة
وناس تدي الفلوس لحمة
وناس عينها بتعكس ناس

وناس ثابتة أماكنها..
وناس بتلف
وناس تشحت على الرصفان..
وناس بتعف
وناس ماشية على الرصفان..
بكيفها تتف!

وناس تنفخ سيجارة بغِل
وناس صابرة.. ومش بتمل
وناس من حالها مخنوقة..
ف اخر الشهر مزنوقة
وناس بأملها تتعلق..
وخيرها ف غيرها ملحوقة
وناس آخرتها تتعلق..
ف حبل همومها مشنوقة

ف عين الناس بشوف قصة..
واخمن قسوة حاضرهم ايه .. من البصة!
ف عين عيل بشوفه وحيد..
أبوه سافر..
لأكل العيش..
بشوف قصة
وعين جرسون ولسة جديد..
وبيعافر..
عشان بقشيش..
بشوف قصة

وناس بتبص لي وتضحك..
على محطة ترام سيدي بشر
وناس قاعدة تقزقز لب..
و مـ الشباك بترمي القشر!
فناس تنصح فتتجرح
فناس تغلط فبتبجح
فناس بمزاجها بتشوح
فناس تضرب فتطوح
فناس تزهق فبتروح
فناس تنده: فين الشرطة!

وحفضل كدة ببالي المرتاح..
بشوف مشكلتي كالنقطة
لا حيجيلي ف يوم نقطة..
ولا حدخل ف يوم.. نقطة

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى