ط
مسابقة الشعر العامى

زينب. مسابقة الشعر العامى .بقلم / محمد إبراهيم أحمد .مصر

محمد إبراهيم أحمد
الشهرة كوش محمد
مصر_الاقصر_اسنا
شعر عامي نص بعنوان (زينب
هاتف و واتس 01141106597

مفتتح
بلوة بلاني الشوق والمبتلي عبرة
كنت المريد والسير كنتي لي كالحضرة
حالف لاعيش سواح يا ام القليب افراح
كانت عنيكي براح… قلبك قبب خضرة
النص
ساعة حسبت حسابي ليه هدي
انا كنت ناوي ابتعد ورجعت
خدني الحنين لعنيها قومت بكيت
مش قصدى بعد الأمكنة يا شجون
ليه اما ابكي تبتسم بجنون
”مش كل دمعة استحملتمها عيون
خايفة لتنزل تجرح العشاق”
دفنت ايديا دموعي في المناديل
وبعدت يمكن عنها ألقى بديل
ضميت سكاتها بكلمتي ومشيت
وفضلت اوزع ع. الورى مواويل
…….
يكفيكوا حزن المبتلي لو داق
او وسع قلب اللي عشق لو ضاق
انا كنت فاهم بس كنا عيال
واما كبرنا اتبدل الموال
عديت قصاد بيتها أشم الحلم
هل لسة باقي ولا مات مقتول
السيما هيا بس شالوا الفليم
وانا ايدي حضناه وباعدي الليل
سابت ايديا ف..نص هذا الحلم
النجم هوا و القمر بهتان
وحبيتي نص الليل بتأن م.السجان
افتح بيبانك ولا مش مسموح
ردت عنيها بالدموع ارحل
السجن أصعب لو حبسنا الروح
وانا روحي راحت لما راحت لك
كان ايه رماني ع.الوجع والويل
بصيت انا ع.السما كعبل عيوني الليل
والليل دا صاحب كل صاحب كيف
الليل دا صادق بس ليه في الزيف
وانا كيفي حكي القمر بس القمر بحالات
اوقات يصاحب سكتي لكن غريب اوقات
اوقات يكون طيب كتوم السر
وساعات كتير يفضح آنين النور
ويعاند النجمة تعيد الدور
يا معشمين القلب بالأحضان
خفوا عليا اللوم اذا وليت
انا حضني كان ليها فاتتني بكيت
زينب يا ست الحضن زرعك طاب
ازاي أضم الندى وانا حضني بعدك بور
زينب يا بنت الحزن كلي هموم
انا نشوتي ضحكتك خدها الزمن عنوة
كنت اسكرك ع.الريق كنت اكتبك غنوة
مطلعها كان بستان بس النهاية الشوك
كان ليا صاحب جدع قال لي العيون غشوك
فخسرته وكسبتك وخسرت في الحالتين
مش قصدي قوله صحيح بس الوجع بيهد
كان بينا مليون سد
وانا قولت اعديلك
لم خوفت م. الاحزان ولا صدني قيلك
حافي انا ع.الشوك كان نفسي لورودك
جودك يا ست الجود طمعني بوجدك
ما اعرفش اخرتها
حفضل انا والليل نحلم تضمينا
ولا حكون مرحوم وتحني بورودك

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى