ط
مسابقة الشعر العامى

ساكن فى شقة بالإيجار ..مسابقة الشعر العامى بقلم / محمد صلاح عوض محمد من مصر

خاص بالمسابقة
اسم العمل / (ساكن فى شقة بالإيجار )
القسم /الشعر العامى
الاسم / محمد صلاح عوض محمد
الدولة / مصر
السن /25

ساكن فى شقة بالإيجار
شارع 15و33 رقم العقار
على اول النصية راكن هناك بتاع الخضار
والحارة متزينة بقلوب الناس كلها عمار
وعيال بتلعب كورة دايما طول النهار
وعمى حسن بينده تعالى ذاكر يا واد يا مختار

وعربية جارنا لونها نبيتى
والست ام أحمد بتنده شيل الشنطة اللى أيدى
وميعاد الحقنة بتاعت الست ام فرحات
الحقها يا دكتور بتجلها سبع دوخات
ومهندس ماشي يقيس المسافات
وباص المدرسة وقف ونزل منه خمس بنات
وآذان الفجر وقبلها صوت الإبتهالات
مصر بلد الخير فى كل الأوقات

وافتح شباكى الآقى العيون العسلية
الصبر جميل وانا قلبى عاشق يا صبية
اسمع حواديت وغنى ومواويل
وصوت ام كلثوم فى آخر الليل
وأشوف كتير لكن بتعشقك عنيا
وبلاش مراسيل انا قلبى عليل
ما تردى بجواب كفايا عذاب
وبلاش شغل الملاغية
الحب باين عليكى وعليا
اول ما شوفتك ساعة الصبحية
كان يوم جميل فى بداية السنة الهجرية

على اول حارتنا هتلاقى دكان
بسبوسة وتسالى وكمان دخان
وراجل كبارة صاحبها عمى رمضان
هتلاقى كل الناس هناك
ولمة الصحبة ويا الجيران
وأنا صاحى الصبح متأخر
وناسي ميعادى فى وزارة الإسكان
مقدم على شقة ورقمى خمسة بعد الستين
الحارة كلها تمليك وانا ساكن فى شقة بالإيجار
فى عمارة دورين
وصاحبها مهاجر من زمان
السن 25 والحالة أعزب
وأنا عايش مبسوط وأسمى فلان

#ساكن_فى_شقة_بالإيجار
#الشاعر محمد صلاح عوض محمد

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى