ستى ماتت
كلمات / رضا ابو الغيط
******************
لسه فاكر ستى لما
كنا نقعد جنب منها
ف بيتها لمه
تحكى لينا عن ما ضينا
واللى بينا
لما كنا… نستحمى
كنا لسه عيال صغار
شمع قايد وسط دار
فرح طارح ف المطارح
شمس جايه بالنهار
كنا جزء من الغلابه
بس كات نادره الديابه
وم الطيابه
كنت أقول لستى يا مه
وكنت اقول لسيدى يابا
كات تشيلنى فوق كتافها
رايحه جايه عامله زفه
أصلى حيله وابن عيله
وأمى كات بتدفى لفه
لما بضحك
كنت اشوف الوش يضحك
ولما يوم اعمل مكشر
كات تجيبلى كيس مفشر
وتدادينى وتلاغينى
وتنادينى يالا أصالحك
كات تجيبلى جوز حمام
كل ليله عشان انام
قلب ستى شكل تانى
تلقى فيه رمز السلام
ستى لما بتبقى جنبى
كنت اشوف الدنيا بمبى
كات تطلع سيلتها
وكات تجيب لى المستخبى
ولما كان العصر يدن
كنت اطلب عيش ملدن
تدهنه جبنه بإيدها
وقشطه سايحه لونها ابيض
لون حنانها اللى مًليها
وف دقيقه قصدى ثانيه
سيتى تجرى ع المشنه
من حصيره معلقاها بين عينيها
ألقى سيتى عمله ليا ساندوتش
اخدوا واجرى حافى من غير الكوتش
كنت عيل نفسى ألحق أى ماتش
بس كات دايما تقولى
تيجى بدرى
قبل ما الدنيا تليل
روح ياروحى نفسى منك ما اتحرمش
ولما شمس الكون تروح
وتبقى جايه المغربيه
كنت اشوف ستى تلوح
وف ايديها شايله ليا الجلابيه
ستى كانت أحلى شابه
كات تخدنى ف حضن ليها
واستخبى
تحت حِمل
فوق شواشى أحلى قُبه
واختى قاعده جنب منها
وف ايديها شايه جبه
ايوه جبه أحلى لعبه للبنات
كات بتلعابها ف سُكات
وستى قاعده بتدادينا وتلاغينا
بتلاقينا ونلاقيها
كات تملى خيرها لينا
وكات بتحرسنا عينيها
ستى ماتت
ستى ماتت مش لاقيها
بس دايما ليل نهار
أنا با ادعى ليها
وف عينيا صوره ليها ومداريها
لو ف يوم الدنيا ضاقت
با اجرى دايما
واستخبى بين عينيها
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
