ط
الشعر والأدب

ف حبّ الجيش.قصيده غنائية بقلم الشاعر /محمد عبد اللطيف

محمد عبد اللطيف

قصيده غنائيه
ف حبّ الجيش
…………………
دايماً دايماً
حمّر عينك
لمّا يجيلك
حدّ يقولّك
هات قرشين
حمّر عينك
قولُّه منين
أيوا منين !
قولُّه الحاله بجد مافيش !
بكره هاتحلى وبكره تعيش
بكره هايجي الخير ويعوّض
تعب الشرطه وسهر الجيش !
دايماً دايماً
حمّر عينك
لمّا يجيلك
حدّ يقولّك
هات خوختين
حمّر عينك
قولُّه منين
أيوا منين !
قولُّه الشجره بعافيه شويّه
أيوا مريضه ومحتاجه مايّه
وانت ياخويا ايديك ف ايديا
نسقي الشجره بتاعة الجيش !
دايماً دايماً
حمّر عينك
لمّا يجيلك
حدّ يقولّك
هات رغيفين
حمّر عينك
قولُّه منين
أيوا منين !
قولُّه الفرن وشطّب بدري
قبل مايبدأ شغل البلدي
حتّى عجين الفرن الخمري
راح لاخوانك أهل الجيش !
دايماً دايماً
حمّر عينك
لمّا يجيلك
حدّ يقولّك
هات بيضتين
حمّر عينك
قولُّه منين
أيوا منين !
قولُّه الفرخه بتهتف ضدك
اطلع اطلع برّه حظيرتك
وبتنقرلك وبتزغرلك
لاجل تودّي البيض للجيش !
دايماً دايماً
حمّر عينك
لمّا يجيلك
حدّ يقولّك
هات أوضتين
حمّر عينك
قولُّه منين
أيوا منين !
قولُّه قواعد البيت دي بنايتك
حمرة طوبوا بتشبه دمّك
لكن رملة مونتوا عجينتوا
ملك الجيش وصحاب الجيش !

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى