ط
الشعر والأدب

قسمة وضرب للشاعر / محمود وحيد

محمود وحيد
قسمة وضرب
وطرح احزان
وهم وكـــرب
وهدم اوطـــان
حتى الجمع
يا دوب للفتنة
ما بقاش جمع
للبنيـــــــــــان
قسمة ف عرف
الحاصل قصد
والمقسوم معلوم
الخطوة
مش مسموحله
قبول أو رفض
اما القاسم
فسيف مسنون
عارف مين الدور
هيطوله
مين هيعدى
ومين هيهون
جدول ضرب
الكون تباريح
رماح بتطيح
تخطف دقة قلب
الشارد
واللى يقاوم يد
الريح
ضرب الحاضر
ما يتبدلش
ولا يقبلش
يكون الضارب
يوم مضروب
عشان الغالب يفضل
غالب
وبعد يساوى
كل الناتج
اكيد مغلوب
تطرح طارح من
مطروح
طرحك له ف الاخر
حد
ايد تتمد
تمسح كل نواتج
حلمك
تكتم صوتك
تمحى معالمك
ترسم صورة لقارب
موتك
ان القارب
صابه جنوح
لاجل ما تقبل
جمع همومك
فوق مهمومك
تجرى تدارى
العضم الباين
جوة هدومك
تجمع كل تاريخ
الخسة
تحت تراب
الوطن الساكن
فى عيون ناعسة
تمسح دمعك
بدمع عيونها
تكتب فوق السطر
يا ناعسة
مات أيوبك
مات أيوبك

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى