ط
مسابقة الشعر العامى

قصيدة (أغنية الشهيد) مسابقة الشعر العامى بقلم / عزة سالم

مشاركة فئة الشعر العامى

🇪🇬 🇪🇬أغنية الشهيد🇪🇬 🇪🇬
**********
بَاسنى فى خدِّى وقاللى اتغَدِّى
واسمعى لما الصوت هيعدِّى
هَبقَى بقولك: إنى بحبك
ساعتين والطيارة تعدِّى
هرسم قلب وجُوَّاه سَهْمْ
قلب بلدنا بينزف دمّ
واحنا دَوَاها.. واحنا طبيبها
زى ما ماما…. بابا حبيبها
وهَطَيِّبها… حتى بدمى
عنها هدافع نار ومَدَافعْ
علشان بأمانها… تتهنِّى
قولتله: عايزاك تبقى معايا
نشترى لبس العيد وكفاية
طقم بسوسته وتوكة وشنطة
وخروف العيد علشان نِدِّى
للفقرا… أنا وانت وجدى
لكن راح وماجاش من يومها
واستنيت طيارته تعدى
قالوا راح علشان يحمينى
بس أنا عايزاه يرجع ليا
دايما بالليل بيغطينى
يحكيلى حكاية طيار
حب بلدنا ليل ونهار.
واستشهد ورواها بدمه
ماقبلش ياخدها الأشرار.
أنا بنت البطل اللى بصورته
تكمل حته فى صورة مصر.
وعمل من جسمه لها كوبرى
علشان توصل بر النصر.
وفرد دمه عشانها شوارع
قاللها على دمى هتعدى.

عزة سالم
جمهورية مصر العربية

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى