ط
الشعر والأدب

قصيدة ( أنا وهو ) للشاعر / عماد البدرى

أنا و هو

ولحن غريب علي الأوتار

في وقت هدوء يغنيلي

وأردد في الكلام وانهار

وينزل دمع من عيني

فا يسألني حبيبك فين؟

فا تكتب إسمه شراييني

أنا و هو

ونبض النبض من جوه

بينزف م الموجع حواديت

ولحن جراحنا م القوه

وتر روحنا صبح فتافيت

أنا و هو

نكلم عقلنا التايه

على بر الزمن تاني

وطيرنا في الهوا تايه

في دنيا عاشقه حرماني

أنا وهو

مصمم إنه يتعبني

وزايد جرح في جروحي

ولا حاسس أنين نبضي

ولا فارق وجع روحي

أنا وهو

ودنيا غريبه بنشوفها

وشوش في حقيقه مختلفه

عيون نعرفها من خوفها

بتظلم ليه ماهش عارفه

أنا وهو

ونهد حنانها يروينا

ولكن حضنها قاسي

وقاتل كل أمانينا

ومين فينا يكون ناسي

أنا وهو

وعود روحنا اللي خان روحنا

وسابنا والوتر مقطوع

ولحن أوجاع ملامحنا

ف صرخه صوتها مش مسموع

أنا وهو

بنبكي بالدموع الدم

ومين في الدنيا حاسسنا

عشانهم شلنا ياما الهم

وقولنا نضحي دول ناسنا

أنا وهو

ولحن غريييييييب

علي الأوتار

في وقت هدوء يغنيلي

أردد في الكلام وانهار

وينزل دمع من عيني

فا يسألني حبيبك فين؟

فا تكتب إسمه شراييني

ويتبعتر حنين حبي

أنا وهو

أنا و…………

… عماد البدرى …

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى