ط
الشعر والأدب

قصيدة :إسمُه علي .. للشاعر / أحمد الخدرجي

إسمُه / علي

والنقب / زين العابدين

ماهُش ابن مولانا الحسين

دا ابني أنا

نقطة مطر..

مست خريف الأرض فاتحول غُنا

وانا كنت فين؟!

أنا مش هنا

أنا كنت ف الأحلام باجهز شنطتي

لسفر بعيييييد

يمكن يكون سابع سما

أو أرض حلوة وطيبة

ويجوز مخيفة ومجرمة

………………………………………..

بصيت لصورتُه استغرَبِت روحي الشبه

وكأني باصص ف المراية من سنين

خدني الحنين

لاحمد قديم ف المدرسة

واقف وبيقول النشيد

وامُه بتحضن ضل صوتُه من بعيد

م البلكونات

يخرب……… جمال الذكريات

والروح دي عارف سحرها

تشبه لروحي وسرها

تشبه تمردها العفي على كل شيء

ياااا طلقة الحلم البريء

مين اللي رجعني كده

طفل ف هدوم أمُه القديمة بيتنفض

م البرد ومدفيه ونس

قلبي اللي كان قافل شبابيكُه وخلاص

قتل الحنين

ليه فجأة حس

إن الحكاية بتبتدي من روح « علي»

ودموع « علي»

وعيون « علي»

أنا (حطني السيل من علِ)

وخطفني « زين العابدين»

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون

مقالات ذات صلة

زر الذهاب إلى الأعلى
Secured By miniOrange