ط
مسابقات همسه

قصيدة :إشهدي يا مصر .إهداء للشرطة فى عيدها للشاعر / بكر بسيونى

_____ ( إشهدي يا مصر ) _____

لما نزلت في يناير

كان قصدي إيه يا بلدي قولي ؟

يوم ما شيلت روحي ع كفي

يوم ما رفعت رايتك بيدي ؟

إنطقي قولي الحقيقه

قولي للي خانوا عهدي

قولي إني برئ يا أمي

م المؤامره و الخيانه

قولي يا مصر إنطقيها

قولي إن الثوره كانت

وأنا زي غيري آمنت بيها

عمري ما خونت الأمانه

عمري ما فكرت أخونك

قولي يا مصر إظهريها

دي شهاده وثقت فيها

كان هتافي بكلمة أرحل

للفساد إللي مليكي

كنت بأهتف بإسمك إنتي

و الهتاف ملو الحناجر

ما كنتش أعرف إن بينا

خونه ماسكين الخناجر

إنطقي يا مصر قولي

مين إللي أخلص لك و صانك

و إكشفي مين إللي خانك

قولي يا أمي مين فينا باعك

و مين فينا صانك

عرفيهم دي شهاده

عرفيهم إن يناير كانت إنتفاضه

لشعب عاش سنين طويله

بدون إراده

يومها نزلنا ف الميادين والشوارع

كانت مطالبنا بسيطه

م الخلا تدارينا حيطه

و لقمه ناكلها بكرامه

كانت أحلامنا بسيطه

إننا نشوف العداله

إننا نحلم ببكره

يبقي لينا بيت و عيله

عمرنا ما فكرنا نغدر

عمرنا ما فكرنا ف خيانه

كانت أحلامنا بسيطه

و عشانها قمنا ع الظلم ثورنا

بعد ما فاض يا أمي بينا

نبقي ليكي يا مصر خونا ؟

نبقي بترابك غدرنا ؟

نبقي ما صنا الأمانة زي غيرنا ؟!

إنتي شاهده علينا دايما

إنطقيها برئينا

قولي مين خانك يا غاليه

قولي مين خانك و خانا

إحنا ٠٠ عشان ع الظلم ثورنا ؟

ولا إللي تاجروا بالدين و بينا ؟

قولي مين خانك يا أمي

إنطقي قولي الحقيقه

………………..
٢٥ يناير العيد القومي للشرطة المصرية ، و يوم الوفاء لشهدائها الأبرار
بكر بسيوني

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى