شيل يا عم فاسك
وإضرب الأرض
لجل ماتدي خير ليك ولناسك….
و انت كمان
إفتح كتابك..و إقرا تاريخك
و إكتب الصح ف كراسك…….
فى ناس حواليك
مش عايزاك تِقِب
و بتعِد عليك أنفاسك…..
بيرضعوك الخيانة
و بيحلفوا لك على كدبهم
لجل ما يموت حماسك………
عايزينك تتوه و تفقد الأمل
و تكره الوطن إللى هو أساسك…..
عايزين يشوفوك لاجئ
على حدود البلاد
بايع حتى لباسك……
إرفع فاسك
و حِشُهم بالمنجلة
و دوس عليهم بمدراسك…….
مصر طول ما فيها
إللى خايف عليها
و جنود حارسينها وهما برضة حراسك….
عمرها ما تقع
ولا تجوع
ولا تعطش
و دة كلام لازم تحطُه جوة راسك……..
إدوارد المصري
