ط
مسابقة الشعر العامى

قصيدة : حكاية مصر . مسابقة الشعر العامى بقلم / غادة العليمي

غادة العليمي
صفحتي على الفيس بوك:
https://web.facebook.com/doddakamal2014?_rdc=1&_rdr
الواتس تم إرساله في رسالة على الايميل
*******
حكاية مصر

ولسه الشمس بتدفى
ولسه الحب بيكفى
ولسه مواويل الغنا بتسرد الحكايات
حكم ودروس من العبرات
ولسه ودايع الأحلام من غير سحوبات
ولسه الضحكة بتجاهد عشان تطلع
ولسه عقد الحلم بيبرق تحت الشمس أهوه ويلمع
ولسه الأسمرانى أبو قلب كبير أصيل مجدع
على باب الله بيستفتح ويتشجع
أسطة وكله ألسطه فوق واسمع
ومحاسب .. بس حاسب منه .. لو يجمع
وفلاح بلدى بيحصد خير وفـ أمل يزرع
ودكتور مصرى بحرفتنه الوباء بيخشع
وفنى جنى فى الشغلات رهيب مبدع
وصناعى ووراء المكنة يقود مصنع
وظابط ظابط كل أداء.
ده مين ده اللى يزعزع أمن الناس
صحيح فى وجوده إزاى الأمن يتزعزع
وفى الجامعه حارسوا صاينوا رب الخلق
شاب حليوه تشوفوا تقول بالحق
ده فى بلادنا الرجولة أهى بتتصنع
وفى المينا على سفينة كابتن ما يهاب موج
يلملم لحم البحر فى غزلة فوج ورا فوج
ولا أحلى ولا أغلى ولا أشجع
وسلام للمجند أبو قلب أسد
ولـــــــد.. بصحيح
ولو مصاب ولا حتى جريح لكين على كتفه الأمان يرجع
وستات مصر رجاله بوقفتهم فى وش النار
جدار من الصلب لو تتهد حيطان الدار بيبقوا جدار
وخير بالحيل بدعوة أم بيتوزع
ومهما ضاق علينا الحال
بنضحك اهوه وبننكت
ولا بنبكى ولا ندمع
وفى الأهوال بيمشي برضو بينا الحال وفى وش العدو بنقف بُعبُع
ولسه بلادى الغالية ست الناس وَتد من الماس
ومرسى حياة لكل مين بعتره الطوفان وماله نجاه
هنا مكانه هنا آوانه هنا ناسه وأعوانه
هنا الأمان زى ما ذكره ربى فى القرأن بيتجمع ويتوزع
ولابد من شعاع الشمس إنه يطل
على جبين بلدى ست الكل
مادام فى القلب نبض يدق
مادام فى صبح فجره يشُق
لسه فى الحكاية سطر جديد فيه كلمة حَق
فيه قصة شعب من العفاريت
يبان هادى طيوب وبسيط
يُغرك لما يثور ويغضب ولا حتى يظيط
لكنه إكمنه زى الطفل بيتمرد على أمه لما يحب يتدلع
ساعات تلاقيه سحبة نول ساعات تلاقيه دانة مدفع
وساعات كده الحُب بيحير لما يزيد لما يسيب
ويتبعتر ويتفرع
بلادى وأم الدنيا، وأغلى عندى من الدنيا
حبيبة لكل غريب وقريب وحبيينك
طب بعفيتك كده يابلدى وبعينك
انا كغادة يا ولادة لكل جميل
اقول ازاى كتير وقليل
عن بلدى من غير ما اتلجلج ولا اتعتع
خلاصة القول واللى ما يشترى يسمع
حكاية مصر ما بتخلصش
حكاية شعب نحت الصخر
شق البحر
عبى النهر من المنبع
حكاية مصر صعب احكيها انا فى كام سطر
ياريت اقدر ياريت ينفع

زر الذهاب إلى الأعلى