ط
الشعر والأدب

قصيدة ( شنطة سفر ) للشاعرة / فايزة الألفى

شنطة سفر

“”””””””””””””””””””؛

لما العتاب فى القسوة زاد

لميت حياتى وذكرياتى

فى شنطتى

وسافرت من أول معاد

كان نفسى أزرع يوم أمل

لكن لقيت الأرض بور

طرحت عناد

خدت الكلام ويا الملام

والعشرة بيننا والاشتياق

ويا وحشتينى

وبحبِك قد كل الكون

وقد العشق والعشاق

لميت كمان نظرة عنيك

لمسة إيديك

ومعاها أجمل ذكريات

لما الصباح الحلو ييجى يبتسم

شايل رسالة معطره بأحلى الكلام

تزرع ورود الفرحه فى عنيا

تنقلنى لحاله

واقرا الكلام بالقلب

يرسم من ضياه

حواليّه هاله

أجمل نساء الكون أنا ..

ست البنات .. ؟

وأطير مع التعبير

وادوب فى الأمنيات

شنطة سفر مزحومه

مقسومه لخانات ..

بصيت على جيب الحنان

فلقيته كان أصغر مكان

واللى فيه ..

دول حبه باقيين من زمان

وبعينى شفت الشنطه

بتنقط عذاب

خانة الدموع لما اتملت

فاضت عليها ومطرت

م القسوة ..

من طول الغياب

وانا قلبى متشقق حارات

بيقولوا عنه إنه حيّ

لكنى حاسه إنه مات

فايزه الألفى

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى