قصيدة عامية
بعنوان فات الميعاد
بقلم / كواعب أحمد البراهمي
كواعب أحمد محمد حسين – نجع حمادي محافظة قنا
https://www.facebook.com/kawaeb
فات الميعاد
وتفوت سنين
وأنا ماشي فوق الالم
عازف نغم
من قلب مليان بالعذاب
ولا قادر أنسي
ولا قادرة ارجع بقلب تاب
و يردني تاني الحنين
للون عنيك
وضحكة كنت بسمعها
من قلب صافي
يقول لي
كل نبضة بتسلم عليك
وأنا كل ما افتكر جرح الهوي
في ليل كان أقسي
من صوت المطر
لما ينزل علي بيت فقير
من غير ستير
وأطفال نايمة من غير غطا
في ليل الشتا
متلحفة بأوراق شجر
أنا لسة فاكر
صمت الليالي
اللي كانت مغيمة
و الغيم كاسيها بلون السواد
والمطر ينزل علي الطريق
يعزف سيمفونية بعاد
وصوت الناي الحزين
والروح المليانة أنين
وكل ما أقول هنسي أكيد
وهكتب أمالي في يوم عيد
يجي العيد وأنا مشغول
بالحصاد
أجمع سنابل فاضية
عمرها ما تكفي زاد
آه يا قلب أنجرح
في يوم الفرح
ولا عمره ينسي الجرح
ولا بستان القسوة اللي طرح
ثمار جفاف
ولاالنظرة اللي قالت
القلب خاف
يا ليل طويل
في عينين مليانه بالسهاد
تكذب البراءة في المهد
وتنكر البسمة في عيون الولاد
وتغني لحن متكرر معاد
ما يقول غيرجملة واحدة
حزينة باردة
أنسي خلاص
فات الميعاد .
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
