ط
الشعر والأدب

قصيدة (والنبى ماهتفلح من غيرى) للشاعرة / دعاء النمر

والنبى ماهتفلح من غيرى

ولاحد هايسند فيك بعدى

ده انت يادوبك كنت بتحبى

وانا جيت عَليتك كَبرتك

بس خسارتك

بعد ماهَيئلك إحساسك

إنك تتمرد على سِتك

بعدها سِبتك

ترجع بيك مطرح مابدئتك

كنت بتُحفر بإيديك وجعك

كان مين سمعك

كان مين يقدر يفهم تعبك

ولايرمم قلبك حبة

لو مين اشترى كان مين ربى؟!!

كنت أنا اكتر حد مأَمـِن

قال عشقاك وهاكَمِل بيك

شوفتوا غباء ف الكون ده مكمل؟!!

شوفتوا إيدين تقدر تتحمل

حد بيعرف يبقا حويط

حد بيرسم دايماً وشه

حد بيقدر ينكر غِشه

وحد مصمم يبقى عبيط

عين الناس كات دايما شاهدة

وكنت انا جنبك تايهة وشاردة

كل خطوتى اخرها ف خطك

سِبت طريق الغير واخترتك

كنت انا زى اللى مالوش زى

ومين تتحمل لحظة تكون

لو هاتلف لأخر الكون

كنت أنا أول أخر حد

يَعلىِ ويبنىِ وبرضوا يهد

كنت بكدب صدق عيونى

لوحِلفولى كُنت اعميهم

كنت امحيهم

كنت بَطَلع كل مشاعرى

وبين خطواتك كنت ارميهم

قلت انا عادى حبيبي واهلى

ومهما انابدى اكيد يستاهل

مش بالساهل..

مش بالساهل.. قلبى يفَرَطْ

ولايخطط يجرح فيك

كان احساسي عليك يتشاهد

سِبت إيديا ف دوُست عليك

مهمابتدى لغيرك خيرك

وبتيجى علشانه عليك

مش هَايقولك كتر خيرك

لماتمد إيديك بمحبة

حبة ف حبة هاياكُل فيك

دعاء النمر

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى