ط
مسابقة الشعر العامى

قصيدة .وقت غروب القلب .مسابقة الشعر العامى بقلم / أحمد ربيع رزق الدخاخنى .مصر

احمد ربيع رزق الدخاخني
من مصر
https://www.facebook.com/profile.php?id=100007231333573

وقت غروب القلب

دلوقت الشمس تِلف الأرض بحالها
وتوزّع نورها الصبح لكل الناس بالدور
وتمُر تفرح زهرة يتيمة من عباد الشمس
ده لأن بقالها 12 ساعة بتشحت ضوء
دلوقت هنسقي الأرض وتطرح شوق
ونواسي القمح عشان مش موسم زرع الغله
ونجيب القطن بكل هدوء علي هيئة فُل
ونراضي الكل..
دلوقت الشمس تلف الأرض بحالها
الا مكان ماشافتنا بنبعد.. تطرح ضل
والكادر هيوسع.. فجأة نلاقي مُسن
واقف يتسند علي ست عجوزة بقلب بشوش
ووشوش مليانه ملامح صادقه وعشق بجد
مش اول صدمه تلاقي الحبل اتفك
والزيف المبني بإسم الحب في ثانية اتهد..
بياع الفول..
كان واقف يعصر روحي لمونة صبر
ذودلي الشته شوية لأني حزين
المشهد كله سواقي بتقلب علي طواحين
والباقي اتنين .. بقوا واحد بس
واخدت بواقي العشق في جيب الطين
مقلوع في مواسم ليها نصيبها في هيئة زرع
والناس بتربي الزرع كأنه جنين
الدنيا بتكبر فجأه لاقيتني قصادها قليّل
بعد ما كنت كِبرت شوية..
برجع عيل
وكأني خسرت اللعبه في صورة بنت
وبكيت وكابرت..
وكبرت لاقيت الصوره فشنك
والصوت كان اوضح.. لو هتدُّق
عقارب ساعتي عكس الوقت
هكبر دلوقت..
وهبطل ابكي واقول ياخسارة
في كل خسارة لحد الفوز
وهبطل عوز..
ده لأن يجوز.. كان اصلا خير
والشمس بتظهر كل ماتلقي الأرض تدور
وانا من ساعتين..
حسيت الفجر بيطعن قلبي في وسط الليل
وماحدش حس..
دلوقت الشمس.. تلف الأرض بحالها
وتوزّع نورها الصبح لكل الناس بالدور.

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى