كرامات الحب
……………
الحب مركب شمس
بتشق بحر الليل
شروق
الحب نسمه ف حضن ضوء
جايين من الكون البعيد
يرتاحوا فوق كفِّك نهار
ويدوقوا من حضنك حياه
وانا قلبي ف طريق الغرام
يا حبيبتي واصل منتهاه
وان كنت ف الحب الإمام
فَ عينيكي ترنيمة صلاه
وهواكي ليّا طوق نجاه
وانا كنت من قبلِك غريق
قلبك نهار غير النهار
خد إيدي ورّاني الطريق
وفرشت إحساس البرئ
سجّاده تحضن خطوتك
يكفاني دايما ف الحياه
يا حبيبتي جنّة ضمّتِك
رابط حياتي بدنيتِك
ف ما تقطعيش حبل الوداد
خلّيني ف بحور الغرام
ياحبيبتي ليكي السندباد
وانا ح امشي ليكي ألف ميل
واعبر حدود كل البلاد
إستنّي قلبي وح تلاقيه
يا حبيبتي جايلك ف الميعاد
وف إيده عقد من النجوم
والطرحه من خيط النهار
دا هواكي فعلا باختصار
خللاني أقوى من الجبال
خللاني أقدر ع المُحال
واكسر دراع المستحيل
أقطف من الليل النجوم
والبحر أزرع فيه نخيل
وأمد إيدي أجيب شموس
واسحب نهار من بطن ليل
طول م انتي جوّايا الدليل
الحب يعمل معجزات
الملح من حضن الغرام
يصبح أوام سكّر نبات
ومدام ف أحضانك ح ابات
كرامات ح تظهر للجميع
ودا كُلّه من …
فعل الغرام
……………………………………..
محمد ابو العبادى
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
