ط
مسابقة الشعر العامى

كلمة وطن. مسابقة الشعر العامى بقلم/ الشحات عبد الحليم سليمان النقيدى .مصر

قصيدة خاصة بالمسابقة ـ فرع الشعر العامى
بعنوان ( كلمة وطن )
……………
يعنى إيه كلمة وطن !؟
يلاَّ قولوا قوام تجلُّوا
يعنى لُغز ويعنى حلُّه
يعنى تبقى كريم يا حالُّو
يعنى غَطْسَة فْ شهر طوبة
يعنى غِنْوَة فى الخطوبة
يعنى ضِلَّة فْ حَرْ صيف
حُضْن دافى فى الرطوبة
يعنى جامع جار كنيسة
إيد إيفون مع إيد نفيسة
يقتلوا فى نفوس خسيسة
يبقوا ورد الكون وفلُّه
يعنى أم وحضن دافى
يعنى نبع الخير وصافى
يعنى نيل بمحبَّة وافى
يعنى قلب يساعى كلُّه
يعنى ناس بتحب ناس
والتديُّن ده الأساس
يعنى أرض عليها داس
أنبيا صاموا وصلُّوا
………….
يعنى إيه كلمة … وطن !؟
يعنى طفل ونادى بيه أمَّا رطَن
يعنى شعب بيفتديه
ولا يرتضيلُه بالعطَن
يعنى لمَّا ينادى ويقول انتباه
الكل لازم يلتزم
يثبت محلُّه
يعنى إيه كلمة وطن !؟
يلاَّ قولوا قوام تجلُّوا
………….
فسَّرولى واكتبولى
يللى فاهمين الكلام
يعنى إيه كلمة وطن ؟
يعنى إيه نصبح ما نلقاش الحروف ؟
يعنى إيه الأمن يتبدِّل بخوف ؟
يعنى إيه الضى يتبدِّل كسوف ؟
أوخسوف
يعنى إيه الخِلْ فجْأة ما يلقى خِلُّه ؟
أو يلاقى النور يضيع
والليل داخلُّه
ونقول على الدنيا السلام
يللى فاهمين الكلام
ده احنا بِنْعِزْ الوطن
ولا نِرْضَى ذُلُّه
يعنى إيه كلمة وطن !؟
يلاَّ قولوا قوام تجلُّوا
………………
الوطن ده ” واو ” و ” طَاء ”
وتضيف لهم الحرف ” نون ”
الوطن هوَّ الغِّطَاء
فى كل شدَّة يا ناس حنون
الوطن آوى الجميع
للأمين واللى يخون
واللى له ميت ألف لون
واللى منفوخ كالبالون
واللى مانع للماعون
الوطن خيمة إله
الوطن قارب نجاة
الوطن يعنى الحياة
للى تاه ولا شئ فاضلُّه
يعنى إيه كلمة وطن !؟
يلاَّ قولوا قوام تجلُّوا
………………
يعنى إيه كلمة وطن ؟
اسألوا العايشين بعيد
امتى حسُّوا فْ يوم بعيد ؟
امتى شافوا الشمس أوغنَّى النشيد ؟
يعنى إيه يصحى ينام ما يشوفش مصر ؟
يعنى إيه الغربة تعصُر قلبُه عصْر ؟
يعنى محروم أهراماتها
وحُزْنُه زاد ولا لهش حصْر
يعنى حُضْ بيحمى حتى خلق ضَلُّوا
هوَّ ده … معنى الوطن
ع الأنبيا يا خَلْقْ صلوا
…………..
الشحات عبد الحليم سليمان النقيدى
البحيرة ـ مصر
هاتف 01287877895

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى