الإسم \ طه إبراهيم سيد العنوان \ قرية الدير \ طوخ \ قليوبية _ مصر ت1027224646 نوع القصيدة \شعر عاميه كوكب تاني *** انا مش هكتب تاني أغاني انا مليت وكرهت زماني كلمه عاديه خرجت مني خلّت كل الناس تنساني اللي ظلمني وشايل مني واللي ف عز الشدة عداني ليه الحق يا ناس بيزعل اللي عاملي الدوشه لساني آه يا لساني آه يا لساني مره يزعل مني صديقي ومره يزعل مني جيراني أضحك رغم الغلب في قلبي ضحكه تبين كل سناني وافضل أجامل غصبٍ عني وافتح داري للي أذاني اه لو حته وسط الصحرا اقعد فيها وسد وداني وابدأ صفحة جديدة هناك واعمل نفسي واحد تاني واربط راسي وريح قلبي واكسر قلمي وعض لساني وافضل عايش وسط الصحرا يمكن ارحم من اخواني هي صحيح مليانه وحوش بس مفيش ف الصحرا اناني هي صحيح فيها برد وخوف بس مفيش ف الصحرا لوماني مفيهاش واحد لابس وش وساعه يغير وشه التاني مفيهاش واحد نازل غش ومصدعنا خطب ومعاني تسمع منه تقول الله دنيا غروره وعالم فاني هو بذاته في نفس اللحظه يلدغ لدغه تموت في ثواني وسط الصحرا دنيا بسيطه من غير سور ولا فيها مباني وسط الصحرا حاجة لطيفة من غير نور ولا فيها غواني وسط الصحرا كله يساوي مفيهاش واحد كوكب تاني وسط الصحرا مفيهاش فوضه فيها قانون معمول للجاني وسط الصحرا مفيش غل رزق وجاي مخصوص رباني يعني سعاده ملهاش حد يعني سعادة لكل جيراني وسط الصحرا هنسي العالم وانسي الدنيا وكل زماني لكن فين وإزاي الأ قيها حتي الصحرا يا عيني أماني كل احلامنا هتفضل صعبه باين كل الناس بتعاني نفسي أسافر دنيا جديده نفسي أسافر كوكب تاني **** بقلم \ طه إبراهيم
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
