لا إعلامي ولا سياسي..قصيدة للشاعر / أيمن صبرى أبو عماد

( لا إعلامي ولا سياسي )
………………

أنا الغلبان وشايل همِّى فوق راسي
عايش أنده على بكره ولاباملك سوى إحساسي
أنا اللى عيوني عطشانه لضي الفجر ف كراسي
أنا الغلبان لاانا م النخبه ولا إعلامي ولا سياسي
……….
أنا اللى عيونى هيمانه لصوت العدل ف بلادي
ويوم الحلم يسمعنى والاقى الرحمه لولادي
……….
ياكل النخبه ف بلادى كفايه كلام
يوماتي النصبه منصوبه وف الإعلام
ولا حالي بيتغيَّر ولاحالي صبح ع البال
ولاالعاصي بيتندم ولاالعالِم بيتقدِّم
وادي حقِّي بيتعتِّم وادي الجاهل صبح فنان
يقول قرآن ويحرّف وف الإعلام بيتشرَّف
وفيــــــــــــــن عُــــــــــــــمري أنا الغلبان
……………..
أنا الغلبان وشايل همى فوق كتفي
ولمّا ُقلت فين حقي لقيت حَتفِي
يكونش ذنبي ياخلق الله ف عواطفي
………..
يكونش الحلم كبير حبَّه على نفسي
يكون مطلوب أعيش مغلوب على يأسي
……….
دا ياما كتير سؤال( ديكارت) حيرَّني
وياما حاول غيوم الليل يغيَّرني
….
لكن عشقي بلاد النيل بيغلبنى
ولما اتوه ف يوم عنها يعاتبني
أنا الغلبان وعشق بلادى مدوِّبني
……….
لكن باعلنها للنخبه كفايه كلام
أنا عمري ما كنت ف يوم أسير إحسان
أنا غلبان صحيح أيوه لكن إنسان
باحب بلادي وأعشقها وكُلى ايمان
أنا اللى بجد أنا عاشق .. أنا الفنان
………………..
إليكِ يا أغلى البلدان . إليكِ يا مصرُ كلماتي / أيمن صبري زنون أبوعماد .
صنصفط . منوف . مصر .